Suki nga pasahero - Gula 1

Kada buntag kanunay g’yud nga makabantay si Val sa usa ka estudyante sa usa ka dakbayan dinhi sa Sugbo nga mag-atang og sakyanan sa eskena sa Maghaway, Talisay. Makadaghan na usab kini hunongi ni Val ang mao nga tinun-an aron pasakyon apan dili mosakay kaniya.

Miabot sa kaisipan ni Val nga tingali ang mao nga tinun-an adunay suki nga drayber og PUJ nga naandan na niya’ng sakyan paingon dinhi sa dakbayan. Drayber si Val sa usa ka PUJ nga magbiyahean sa Minglanilla mao nga kanunay g’yud niya nga makita ang mao nga tinun-an.

Napul-an na si Val sa paghunong kay dili man gayud mosakay sa gimaneho niyang sakyanan ang mao nga tinun-an, iya na lang kini nga labyan. Apan lahi ang sitwasyon niini’ng buntaga kay layo pa gani ang sakyanan nga gimaneho ni Val mipara na ang tinun-an.

Atol ‘sab g’yud nga ang bakante nga lingkoranan diha sa front seat. Igo lang g’yud nga nakalingkod ang tinun-an, mibunok ang uwan. “Suwerte g’yud kaayo ka day nga misakay ka. Kun wala ka pa mopara, mabasa ka g’yud,” ni Val.

Igo lang mipahiyom ang estudyante ug wala dayon motubag. Apan paglabay sa pipila ka gutlo, ang tinun-an na ang nakigsulti kang Val. “Kaila kang Ronelio? Nag-drive gani na siya og PUJ ‘sab nga biyahe og Naga,” matud sa tinun-an.

Gihuna-huna ni Val kun may nailhan ba siya nga Ronelio nga drayber og PUJ nga nagbiyahean sa Naga. “Ngano man diay miss? Nganong gipangutana man ko nimo kun kaila ba ni Ronelio?” bawos-sukna ni Val.

“Iya ko’ng anak. Mao bitaw nga maghuwat g’yud ko niya ug dili dayon mosakay ug laing PUJ. Karon lang misakay ko kay taliuwan na man,” matud sa tinun-an. “Unsay imong ngalan?” gipangutana ni Val ang estudyante. (Sumpayan)