Nanaygon nga barangan

Nikatawa pag-ayo si Sandro sa iyang gibuhat kay iyang gipabuthan og rebentador ang iyang silingan nga si Abdel nga nanaygon sa ilaha. Ug gibadlong siya sa iyang mga ginikanan nga sila si Sebya ug Andot nga dili na usbon ang iyang gihimo. Igo lang nangyamiid dalang pagbugal-bugal.

Pagkasunod adlaw untop alas 4:00 sa hapon iyang nakita ang usa ka tigulang lalake nga gidungog nga barangan. Ug didto nahipunta sa ilaha aron manaygon. Wala ang iyang mga ginikanan kay tua sa lungsod namalit og mga pagkaon. Pagkahuman sa daygon sa barangan iyang gipabuthan sa rebentador. Puwerteng kuyawa sa tigulang dayong lakaw. Dinhi nagsugod ang kabangis sa barangan.

Dangta’g pipila ka gutlo may nabatyagan si Sandro nga nagkaanam og kadako ang iyang tiyan. Unya puwerte niyang ngaab sa paghilak kay dili siya makadawat sa nahitabo kaniya. Wala maglangay niabot ang iyang mga ginikanan. Ug nisiga ang ilang mga mata sa ilang nasaksihan.

“Sandro, nganong nidako ang imong tiyan?” nagkadungan sa pagsulti si Sebya ug Andot.

“Mama Sebya ug papa Andot, akong gipabuthan sa rebentador ang barangan. Nia niburot akong tiyan!”

Pagka Domingo nisimba si Sandro sa lungsod ug nag-ampo. Unya adunay usa ka tigulang nga naa sa iyang atubangan nga nag-ampo nga sama kaniya. Nagbasol si Sandro sa iyang gibuhat. Pagkahuman sa pag-ampo nakurat si Sandro, kay ang naa sa atubangan nilingi kaniya. Ug nasabak sa iyang panan-aw, mao ang barangan nga nakadungog sa iyang pag-ampo ug pagbasol sa iyang gibuhat.

“Batan-on, gipasaylo na tika! Timan-i pag-ampo ang paghatag sa nanaygon bisan gamay nga kinasing-kasing, sama ra nga gipakaon ang atong kalag!” sa barangan. Ug nilakaw ang barangan pahilayo kaniya.

Wa magdugay nakita niya sa unahan ang iyang inahan nga padulong kaniya. Apan sa kalit lang nabalik sa naadan ang gidak-on sa tiyan ni Sandro.

“Sandro, salamat nga nibalik ang gidak-on sa imong tiyan!” ni Sebya.

“Gipasaylo ko sa tigulang lalake nga akong gibugal-bugalan. Ug siya ang nanaygon nga barangan!” (Katapusan)