Luwan na sa Sunrays Bus si Aldo paingon ngadto sa dakbayan, diha pa niya mahinumdumi nga wala diay siya makatuman sa sugo sa iyang lawas.
Kaganiha, samtang nag-ilis siya sa iyang panglakaw nga polo ug karsones, gibati siya og kalibangon. Apan unsang pagkaunsaa nga imbes muadto unta siya sa CR sa di pa siya mupaingon sa dakbayan mao na man hinuoy napunit niya ang iyang travelling bag ug nipara sa nagdanga-danga nga sakyanan.
Ug mao ni karon ang iyang suliran kay ingon sa di na kapugngan mugawas na gyud. Simbako og anhi na hinuon siya makalibang sa lingkoranan sa bus. Na maulawan gyud si Aldo.
Gianinaw niya ang palibot. May gamay’ng awaaw nga dapit sa barangay Alo nga sakop sa lungsod sa Oslob. Unya nakahukom siya nga manaog na lang.
“Di ka na lang namo paabuton, Boss,” matud pa sa konduktor,” kay malangay na ang ubang mga pasahero.”
Ingon sa wala na kini mabati ni Aldo. Sagol dagan ang iyang mga lakang nga misum-ok sa labong nga hagonoyan. Motuk-ong na unta siya apan nasangit sa iyang lukon-lukon ang selpon diha sa iyang bulsa. Gikuot kini ni Aldo ug gipatong sa bato nga diha habig sa iyang atubangan. Gibati niya ang kalalim samtang nagpabuhagay. Taud-taod pa ug nahuwasan siya sa kahigwaos.
Isaka na unta ni Aldo ang iyang underwear ug karsones dihang may nasigpatan siya. Nanglurat iyang mga mata sa kalipay.
“Selpon! Yeehee! nakakita ko’g selpon!” misinggit ang iyang galamhan.”
Kanindot sa selpon! Samsung Galaxy! Pagkatanga gyud sa tag-iya aning selpona. Pataka’g biya.
Wa kapugngi ni Aldo ang iyang kaugalingon. Nakalukso siya sa kalipay. Apan sa tanto niyang lukso-lukso kalit siyang napahunong kay nakatunob siya’g medyo basa. Ug pagtan-aw pa niya sa iyang natumban.
“Hugaw sa tawo!” nagpaminti siya sa kalagot. Namalitok ang mga balikas gikan sa iyang baba.
“Kinsa mang way batasan nga nagpataka la’g labay sa iyang hugaw dinhi!” Nanampong si Aldo sa iyang ilong tungod sa kabaho. Unya mikalma si Aldo kay hinayhinay nga mibalik ang iyang memory.
“Hala! Pagkalimtanon gyud nako.” Niya pa sa kaugalingon. “Kining selpon ug kining hugaw sa tawo akoa ra man diay ni tanan.”
Unya mingislit siya’g hilaw dayong lakaw. (Katapusan)