Guwapa nga piniriso

Wala makatingog si Jenny human niya madungog ang paglitok ni Samuel sa pulong I Love You.  Wala siya masayod kun unsay iyang isulti. “Ngano’ng wala ka makatingog sa akong gitug-an kanimo Jen? Maayo unta og dili ka mausab kanako,” ni Samuel pa. “Wala ako masuko nimo uy. Apan naglibog lang ko kun unsay akong itubag. Nakalitan ko sa imong gitug-an,” abtik nga tubag ni Jenny. Miduko si Samuel ug minghoy ang panagway.

Wala siya magtuo nga sugton ni Jenny tungod kay maanyag ang dalaga ug siya anaa lang sa kasarangan ang panagway. Ingon sa maguwang usab siya og pangedaron kang Jenny.

“Nahibawo ko nga wala ko’y kapalaran sa akong gugma kanimo kay maanyag ka samtang ako dili usa ka ambongan. Hangyo lang nako, nga bisan og balibaran nimo ang akong gugma, ayaw balibari ang akong pagtabang kanimo,” ni Samuel nga mitutok kang Jenny. Si Jenny na usab ang miduko ug wala magtingog. Mura’g adunay gihuna-huna. “Ang tinuod Sam, tungod sa imong kabuotan ngari nako, anam-anam mo nga nabihag ang akong kasing-kasing. I love you too Sam,” ni Jenny. Nakaginhawa’g lawom si Samuel nga nakadungog sa gisulti ni Jenny. Gusto unta niya’ng gakson ug hagkan ang dalaga apan nabalaka siya nga basin og lainon kini sa pagsabot ni Jenny ug ingnon nga nagpahimulos siya sa higayon.

Apan wala siya magtuo nga si Jenny na mismo maoy migakos kaniya’g hugot. “Salamat kaayo sa imong kabuotan Sam. You’re the first and my last love,” matud ni Jenny nga miparayeg kang Samuel.

Gitug-an ni Jenny kang Samuel nga sa iyang pangedaron nga 20-anyos, wala pa siya modawat og boyfriend bisan og daghan ang nangulitawo kaniya sa wala pa siya mabilanggo.

Nalipay kaayo si Samuel pagkadungog nga siya ang una nga boyfriend ni Jenny ug ang pasalig sa dalaga nga siya usab maoy katapusan niini nga higugmaon. (Tapuson ugma)