Usa ka adlaw niana, miadto si Mrs. Elvira Lim sa Manila kuyog niya ang iyang driver ug personal body guard nga si Red. Kami rang tulo si James ug manang Ester ang nahibilin sa balay.
Pagkagabii, mi-text si James nako. Paadtoon kuno ko niya sa iyang kuwarto kay may mahinungdanon siyang tuyo.
Wala ko mo-reply sa text ni James. Dili ko moadto sa iyang kuwarto. Nabalaka ko nga tingalig mamatikdan ko ni Manang Ester iniggawas nako sa akong kuwarto. Nagtupad ra ang among tagsatagsa ka kuwarto ug dili ko makaseguro kun nahinanok na ba’g maayo ang lagas nga katabang. Tingalig makamatngon siya ug masundan ko niya inig-adto nako sa kuwarto ni James.
Mitingog ang incoming call alert sa akong cellphone. Si James ang nanawag. Gidali ko kini pagtubag apan pinugngan ang akong tingog.
“Nagpaabot ko nimo diri,” matud ni James.
“Dili ko moanha diha,” giingnan ko siya. “Kun unsa may imong tuyo, isulti na lang dinhi sa cellphone.”
“Gusto kong magkasulti ta’g personal, Jezebel.”
“Dili lagi mahimo. Tingali’g makamata si manang Ester. Gusto ka bang masakpan ta niya ug siya’y motug-an ngadto sa imong inahan nga duna tay relasyon?”
“Lawom nang gabii. Nakaseguro kong natulog na si manang Ester. Pag-amping lang nga dili ka makahimo’g kasikas sa imong paggawas sa kuwarto.”
Wala ko motingog. Naglisod ko paghukom. -- Sumpayan pa