Diwa sa panaygon

Nangabli sa bintana ang drayber sa Hyundai Getz nga itom. Aron maminaw sa kanta ni Stella, diyes anyos nga babaye nga nagdakuldakol sa iyang duha ka palad nga nanaygon sa sakyanan.

Niurong rong buntaga ang kotse sa dalan Escario atubangan sa Kapitolyo padulong sa Lahug. Pula pa ang suga sa trapiko. Ug nakahigayon si Stella og panaygon.

“Day? Nakasabot ka ba sa imong gibuhat? o wala?” matud sa drayber nga niping-it. Wa kasabot kun unsay gikanta ni Stella.

“Ngano man diay, sir? Illegal akong gibuhat? Kuyaw ko’g madakpan?” ni Stella. Nagpahimulos sa adlaw’ng Domingo. Kay wa pay klase.

“Nanaygon ka, day? O nagpakilimos?” sa drayber.

“Nanaygon” ni Stella. Nipahiyom.

“Pero, nakasabot ba ka sa pulong ‘panaygon?” sa drayber.

“Ah kanang mokanta aron mangayog pinaskohan” ni Stella.

“Duol sa husto imong tubag, Day. Apan ang labing husto gyud, nga kamo isip mananaygon, namaligya og kalipay.”

“Ha? Nganong kalipay man?”

“Maghatag mo’g kalipay sa nakadungog sa nindot ninyong awit. Dili kay dakuldakol lang sa kamot unya kangkang dayon. Way kalainan sa pakilimos”.

“Unsaon man diay namo sa pagpanaygon?”

“Labing tinuod, ang manaygon, maghatag kalipay sa tawong iyang gidaygonan. Dili maghatag og sapot. Gusto unta ko nga muhatag nimo’g dakong kuwarta. Apan ang bili sa imong kinantahan, lisod man gani maprisyohan og peso. Busa, peso ra gyuy akong ikahatag.”

“Sige na lang sir. Ok ra ang peso” nakapanglingo ang drayber. Nitunol og peso.

“Salamat, sir” unya niatubang na sab si Stella og laing sakyanan sa pagdakuldakol sa duha ka palad.

Ug nipadaplin siya. Kay berde na ang suga sa trapiko, wa gyud siya’y kalibutan sa tinuod nga diwa sa panaygon. (Katapusan)