Lihok sa silingan

Tulo na ka higayon nga inig agi ni Dante tungod sa pultahan sa balay ni Simeon, mapawong ang esteryo nga nagtingog sa balay sa naulahi. Mga awit ni Engelbert Humperdink ang nagtukar. May igong volume nga madungog sa gawas.

Unya inig agi ni Dante kada buntag gikang nag-hike (kay tua man sa luyo sa balay ni Simeon ang balay ni Dante) mokalit og kahilom ang esteryo sa silingan.

“Ngano kaha? Unsa may tomong sa akong silingan? Giinsulto ba kaha ko?” naglibog si Dante ug nakatuaw sa hilom.

Dugay nang nagbungol ang managsilingan nga kaniadto best friend. Suod kaayo silang managhigala kay parehong hilig og musika. Mga awit ni Engelbert Humperdink ang ilang paborito. Pailin-ilin lang sila asa maatol ilang gana sa pag-sing-along. Magbanosbanos sila’g gunit og mikropono. Kun di sa balay ni Simeon, ari sa balay ni Dante.

Si Simeon ang unang wa nitingog ug wa nitagad ni Dante. Nakigbungol. Sa unang higayon, naglibog si Dante. Apan nadugay, naanad na lang siya. Kay girespeto man niya ang katungod ug kagawasan sa iyang isig ka tawo, sa pagpili sa gustong buhaton. “Kun di siya managad ug di patagad, respetohan nako iyang hukom. OK ra nako. Maayo hinoon. Malinawon” tuaw ni Dante sa hilom, usa ka higayon nga gusto unta siyang mosukmat ni Simeon.

Nasayran na lang ni  Dante gikan sa ubang mga silingan. Nangintriga diay sila. Gikomparar ilang mga tingog ug kinantahan, ug niabot sa dunggan ni Simeon nga ang kadaghanang komentaryo, mas nindot og tingog si Dante. Tampohay og awit ra gyud ang tuyo ni Dante sa pagpakigkantahay ni Simeon. Lingaw-lingaw. Nasayod si Dante nga may mga awit si Simeon nga siya ra ang kamao mokanta. Ug may mga awit sab si Dante nga siya ray kamao.

“Puro ta maayo manganta. Way labaw o ubos nato. Patas ra ta. Busa, dili ta angay magpalabwanay” ni Dante ngadto’s higala usa ka higayon nga nag-sing along sila.

Nangonsulta si Dante og psychologist mahitungod sa lihok sa iyang silingan. “Dunay tawo nga taas og garbo ug di gusto malabwan. Kun may laing tawo nga nahisgutan nga nakalabaw niya, masuya o masila’g siya anang tawhana. Apan sayop siya. Kay di siya angay makigkompara sa uban. Dili maayo ang magpalabwanay” matud sa psychologist.

Nakasabot na si Dante. Ug gibati hinoon siya’g kalooy ni Simeon (Katapusan)