Guwapa nga piniriso

Sayo nga miadto si Samuel sa Palace of Justice kay mokuha og court clearance isip kabahin sa requirements sa pagpangaplay og trabaho. Wala pa gani mobukas ang hukmanan didto na si Samuel nagpaabot.

Nalingaw pagtan-aw si Samuel sa mga binilanggo gikan sa Cebu City Jail nga sayo usab nga nahiabot. Taud-taud, mibukas na ang Palace of Justice ug nakita ni Samuel nga nangandam na ang mga binilanggo aron manganaug gikan sa ilang sakyanan.

Wala dayon mosulod si Samuel bisan og bukas na ang Palace of Justice kay sigurado siya nga dili pa dayon moatiman og mga kliyente ang mga kawani. Nakita ni Samuel nga nagsugod na pagpanganaug ang mga piniriso. Gilambigit ang mga bukton ngadto sa laing mga binilanggo ug nagganayan ang mga piniriso sa paglakaw pagsulod nila sa Palace of Justice. Nakabantay si Samuel nga hitsuraan ang usa ka binilanggo nga babaye.

Angayan kaayo kini sa gisul-ob niini nga orange nga T-shirt. Nakahukom si Samuel nga sundon niya ang mga binilanggo kun asa mupaingon. Ang jail guard nga nag-una sa grupo mipaingon sa RTC Branch 10 nga nahimutang sa second floor. Mihunong ang mga binilanggo ug gitangtangan sa guwardiya sa posas ang duha ka babaye, apil kadto’ng hitsuraan nga binilanggo. Nakasabot si Samuel nga ang mao nga piniriso nag-atubang og kaso sa mao nga korte.

Milingkod ang duha ka binilanggo nga babaye ug ang guwardiya nga nagbantay kanila mibalik sa pultahan sa korte. Nakahigayon sa pagpangutana si Samuel sa guwardiya.

“Unsay kaso ana’ng guwapa nga binilanggo brod?” gipangutana ni Samuel ang jail guard. “Shabu na. Giusikan lang ang iyang kaguwapa kay nag-adoy-adoy,” matud sa guwardiya.

Gipangutana ni Samuel ang guwardya sa apelyido sa mao nga maanyag nga binilanggo. Dayon gitan-aw niya ang calendar sa mga kaso nga husayon niini’ng adlawa. (Sumpayan)