Insultador
Mura man siya’g reincarnation ni Dalai Lama, ni Martin nga nagtan-aw ni Jude, 8 anyos nga special child ni Bonnie. Mapahiyumon ang bata nga nagtan-aw ni Martin. Mura’g buot og tres ngadto’s kuwatro anyos. Bag-o lang niamin ang bata ni Martin. Gipaila ni Bonnie iyang anak ngadto sa silingan.
Nagkaabot sila dinhi sa balay ni Nardo nga nangimbitar og mga silingan sa hikay sa iyang ika-61 nga adlaw’ng natawhan. Human na sila’g kaun sa panihapon nga hikay. Nagtsikatsika na lang sa terasa sa balay sa celebrant. Naghulat sa gisugo og papalit og ilimnon.
Panagsa ra nila makasandurot si Martin. Kay usa siya ka CPA ug tagsa ra mauli sa lungsod sa Amiraw diin nia iyang residensiya. Kun makauli siya, kasagaran adlaw’ng Sabado ug Domingo. Apan bisan kining mga adlawa, masal-angan pa usahay tungod sa iyang kabisi sa trabaho. Tua man siya’y giabangang balay ug opisina sa Mandaue.
Gawas sa pagkabisi ni Martin, daghang mga silingang mataha o mahadlok makigsandurot niya. Kay nadungog siyang insultador. Maong naniid karon si Bonnie, usa ka magtutudlo, kun insultador ba gyud tinuod si Martin.
“Iyang gipasabot nga mongoloid si Jude. Kay si Dalai Lama man iyang gikumpara sa bata. Usa man ka Insek si Dalai Lama. Di lang siya kasulti’g direkta!” sa hunahuna ni Bonnie.
“Naa bitaw mi silingan kaniadto sa siyudad, bayente nay edad. Lalaki. Nagtungha pag-elementarya. Unya kuyogan gyud siya’g yaya. Kay diyes anyos pa man ang buot. Pero pag-edad niya’g trayenta, matured na’g lihok. But-an na,” ni Martin. Niyango si Bonnie. Nipahiyom.
“Ang importante sa special child, tratahon gyud nga normal. Pakitaan gyud og pagpangga. Taasan ang pasensiya sa ginikanan. Pasensiyahan sa mga sipyat,” ni Martin. Nagpahiyom. Nagpahiyom gihapon si Jude nga naminaw ni Martin. Nagsabak ang bata sa iyang amahan. Gihapuhap ni Bonnie ang ulo ni Jude.
Unang nanamilit si Martin. Kay nagkalawom ang gabii. Sayo siyang matulog aron sayong makaandam sa biyahe para sa siyudad. “Di man diay insultador!” ni Bonnie. Nitungab og botelya sa beer atubangan ni Nardo. Niyango sab si Nardo. “Di lang usahay kasabot ang uban sa iyang kaprangka manulti,” ni Nardo. (Kataposan)
- Latest
