Gula 110
Wala ko mo-reply sa text ni Edward. Dili na ko gustong makabaton pa kami’g komunikasyon. Gusto kong kalimtan na siya sa dayon. Hugot ang akong pagtuo nga wala nay kahigayonan pa nga makabaton og katumanan ang among gugma.
Paglabay sa pipila ka gutlo, mitingog ang incoming call alert sa akong cellphone. Si Edward ang nanawag. Wala nako tubaga ang iyang tawag. Alang nako, wala na kami angay pang panagsultihan. Tingalig iya lang kong pasakitan sanglit ang ako mang amahan maoy nagpatay sa iyang amahan. Maong wala gyud nako tubaga ang iyang tawag. Pagkataudtaod nahunong ang pagbagting sa cellphone.
Apan paglabay sa diyes minutos mibagting pag-usab ang akong cellphone.Si Edward gihapon ang nanawag. Wala gihapon nako tubaga ang iyang tawag. Nagpadayon pagbagting ang cellphone apan gipasagdan ko lang kini.
Makadaghan manawag si Edward sa akong cellphone apan wala gayod nako tubaga. Mi-text si Edward ug miingon nga ipatubag ang iyang tawag. Apan dihang mi-dial siya pag-usab, wala gihapon nako tubaga ang iyang tawag. Hangtod nga gipul-an na tingali siya’g dinayal sa akong numero, milunga na siya. Nahilom ang akong cellphone.
Misantop sa akong hunahuna nga posibleng magsige’g samok si Edward kanako. Gusto na kong magmalinawon. Mao nga aron dili na magsamok si Edward nako, akong giilisan ang simpack sa akong cellphone. Sa ingon, dili na makakontak si Edward nako. -- Sumpayan pa