Naningkamot pag-drive sa traysikad si Virgilio, kay hapit na manganak ang iyang asawa nga si Tekla. Unya may nakita siyang usa ka pasahero nga guwapa nga nagsul-ob og lubos itom. Ug nagpadulong na kaniya aron mosakay sa iyang traysikad.
Sa dihang nisakay na kini nasingo niya ang kahumot sa maanyag nga pasahero. Unya nihangyo nga magpahatod sa sementeryo. Tungod sa paningkamot iyang gihatod ang maanyag nga babaye. Sa dihang niabot na sila sa menteryo gibati ni Virgilio ang kahadlok labi na nga gabii na kaayo ug mingaw ang palibot. Ug mikanaog ang pasahero.
Wa magdugay nausab ang kahumot sa maanyag nga babaye. Nahimo kining pormalin ang baho. Unya ningsiga ang iyang mga mata, kay nagkaanam og ka usab ang bayhon hangtod nga nahimong kalabera. Tungod sa kahadlok iyang gibiyaan ang pasahero.
Wa maglangan pasado alas 2:00 sa hapon niadto si Virgilio sa menteryo uban ni Tekla. Ug nanagkot sila sa dakong krus pahinungod sa ilang kaliwat nga nitaliwan sa laing kalibutan.
Wa paabota may nakita sila sa unahan nga daghang tawo. May gisunod sila nga usa ka porlon. Nagkaanam na’g kaduol sa ilang nahimutangan. Unya kay duol man sa ilang gibarogan gitan-aw ni Virgilio ang sulod sa lungon. Wa palandunga nakurat pag-ayo si Virgilio kay ang sulod sa lungon, mao ang maanyag nga babaye nga iyang pasahero kagabii. Nahibulong si Tekla nga nanglurat ang mga mata sa iyang bana.
“Virgilio nganong ningsiga na ang imong mga mata?” ni Tekla.
“Tekla, siya ang maanyag nga babaye nga nisakay sa akong traysikad. Kinsay magdahom nga kalag ang pasahero!” (Kataposan)