Gula 109
Akong nasayran nga usa diay ka dalagang guwang si manang Ester. Dugay na siyang nag-alagad sa pamilyang Lim. Tungod kay lingaw kaayo siya sa iyang trabaho, wala na siya makahunahuna’g minyo. Buotan kuno kaayo ang among agalon nga si Mrs. Elvira Lim.
“Adunahan gyud tingali kaayo ang pamilyang Lim, Manang no?” misukot ko.
“Tinuod kana,” ni manang Ester pa.
Mituo ko sa gisulti ni manang Ester nga buotan si Mrs. Lim tungod kay mas nasuheto siya sa kinaiya niini sanglit dugay na man siyang nag-alagad sa mga Lim. Tungod niini, nakaseguro kong anaa ko sa maayong mga kamot.
Milabay ang usa ka semana. Usa ka higayon niana, mitingog ang message alert tone sa akong cellphone samtang naghigda ko sulod sa akong kuwarto sa servants quarter aron makapahulay human sa akong mga bulohaton. Akong gisusi kun kinsa ang mi-text nako karon pa ko mahinumdom nga dugay na diay nga wala nako magamit ang akong cellphone. Dul-an na tingali sa duha ka semana.
Nakugang ko dihang pagtan-aw nako sa screen sa cellphone, akong nasuta nga si Edward ang mi-text nako. Gikulbaan ko’g kalit. Akong gibasa ang iyang text. Nangumusta siya nako. Nagsusi siya kun hain na ako nga kalit man lang kong nahanaw didto sa among dapit. Gimingaw na kuno siya nako. --Sumpayan pa