Walay pagbati

Dear Tita Salie,

Maayong adlaw. Tawga lang ko og Merian, dalaga. Wala lang ko kasabot sa akong kaugalingon hinungdan nga mangayo ko nimo og tambag nga unta imo kong pasabton sa akong gibati karon.

Daghan kaayong nanguyab nako, Tita, ug dunay mga hitsura apan wala gyod koy pagbati nilang tanan. Ambot kun nganong dili man gyod ko ganahan nila. Anaay usa ka lalaki nga buotan ug dunay motor akong gisulayan pagsugot aron akong masulayan nga dunay uyab. Apan hangtod karon wala man gyod ko’y pagbati niya.

Taudtaod na ming uyab apan wala gyod ko mahigugma niya. Mao nga akong gibulagan apan wala siya mosugot nga magbulag mi. Nihilak na lang hinuon siya tungod kay love kuno ko niya. Unsa kahay maayo kong buhaton, Tita Salie? Palihog pasabta ko. Thank you so much and God bless.

* * *

Dearest Merian,

Ang gugma dili kini pinugos ug dili usab kini puyde nga atong inbentohan. Mokalit lang kini og turok sa atong kasingkasing og wala nato tuyoa. Dili usab mahimo nga atong sugton ang usa ka lalaki aron moturok ang gugma. Dakong kabaliktaran ang imong gibuhat. Tungod kay ang sakto gyod niini, moturok una ang maong pagbati diha sa imong dughan ug una pa nimo sugton ang tawo nga maoy natingban ug gipitik sa imong kasingkasing human nimo mamatud-an nga wala siya’y kabilinggan, buotan siya ug angayan gyod siya sa imong paghigugma.

Wala pa gyod moabot diha kanimo ang maong pagbati busa ayaw pagdali. Ayaw pugsa nga imo na kining bation tungod kay dili lalim ang mahigugma. Ang kamatuoran sa gugma nag-ingon nga ang wala pa makasulod niini gusto kaayong mosulod, apan ang mga anaa na sa sulod gusto usab nga mogawas.

What you can do is just wait for the right time kay moabot ra gyod kini in God’s time. Ug mas maayo seguro nga imo na lang undangon ang imong relasyon karon kay bunga lamang kini sa imong kabatan-on. -- Tita Salie