Jezebel

“Dili na ko gustong mahasol, Mam,” matud ko. “Nagtuo kong lisod kaayong taralon sa hukmanan ang tawo nga milugos nako. Ang importante karon nako mao nga nakabangon ko human napukan. Tun-an ko ang akong kaugalingon pagdawat sa kamatuoran nga usa ko ka biktima sa rape.”

Nagkatinan-away ang inahan ug anak nga Lim.

“Tahuron namo ang imong hukom, Jezebel,” matud sa hamtong nga Lim.

Misugot si Mrs. Elvira Lim sa sugyot ni James nga patrabahoon ko isip maid sa ilang panimalay. Ingon sa nahinangop gani ang hamtong nga Lim kay dugay ra kuno siyang nagplano nga mangita og makaabag sa ilang katabang nga si manang Ester.

Gipatawag dayon ni Mrs. Elvira Lim si manang Ester. Wala madugay, nahiabot ang lagas nga katabang sa sala ug gipaila ako ni Mrs. Lim ngadto niini.

“Sukad karon siya na ang imong kaabag sa mga bulohaton dinhi sa balay, manang Ester,” matud ni Mrs. Lim “Ikaw nay bahalang motudlo kaniya sa mga bulohaton.”

“Oo, Mam,” mubong tubag ni Manang Ester.

‘Sige,” matud ni Mrs. Elvira Lim. “Dad-a na siya ngadto sa servant’s quarter. Gitultolan ko sa lagas nga katabang sa kuwarto nga maoy akong katulganan. Magtagsa diay mi’g kuwarto. Nagtupad ang among kuwarto ni Manang Ester. -- Sumpayan pa