Gustong pahawaon

Dear Tita Salie,

Ang akong problema mahitungod kini sa akong iyaan nga yawyawan kaayo. Kining akong iyaan igsuon kini sa akong amahan. Ug karon ania kami nanimuyo sa balay sa akong lola.

Bisan unsa na lang ang iyang isulti ngari namo bisan kun wala kami nabuhat nga sala ngadto niya. Dili gyud mi kasabot niining among iyaan, Tita Salie, kun nganong ingon siya niini.

Nisamot pa gyud karon nga patay na ang among amahan. Gusto mi niyang pahawaon sa balay sa among lola nga unta bahin na man kini sa akong papa kay ila na man kini nga gibahinbahin dihang buhi pa ang akong lola. Palihug pasabta ko, Tita Salie.

* * *

Maayong adlaw. Usahay bitaw maglisod ta og sabot sa mga sitwasyon sa atong kinabuhi. Adunay daghang tawo nga hakog sa bahandi ug katigayonan. Ug kining maong klase sa tawo dili lang ang mga adunahan apil na niini ang atong kaugalingong kabanay.

Pangita diha og mga papeles sa maong luna nga inyong gipuy-an karon nga magmatuod nga inyo na kanang maong luna aron mohunong na kanang inyong iyaan sa pagpahawa kaninyo.

Duola ang ubang igsuon sa imong papa aron magpatabang nga mabuhatan ka og lig-on nga papeles aron dili na kamo masayonsayon pag-abog nianang imong iyaan. -- Tita Salie