Rape victim - Gula 12

Gikuyawan si Lanie pagkakita niya sa armas nga gitakin ni Richard, ilabi na diha nga iyang nakita ang posas nga gikabit sa bakus sa higala niya’ng polis. Apan misantop sa iyang huna-huna kun ngano nga gidala siya ni Richard sa kasagbotan.

Misantop sa iyang huna-huna nga basin og binuangan na usab siya ni Richard mao nga gidala siya sa mingaw nga bahin dili layo sa dapit nga siya gilugos sa tawo nga gipunggotan niya sa liog.

Nakita ni Lanie nga gihanig ni Richard ang gihukas niya nga jacket ngadto sa bato’ng panas. “Lingkod Lan, ayaw kaikog paglingkod sa akong jacket aron dili mabuling ang imong karsones,” ni Richard pa.

Gituman ni Lanie ang gisulti sa higala niyang police detective. Mitupad usab sa paglingkod kaniya si Richard. “Nalipay ko nga nasayod nga imo ‘sab diay ako nga gimahal Lan,” matud ni Richard.

Wala magtingog si Lanie. Naghuwat siya nga dakpon ni Richard human niya ikatug-an nga siya ang nakapatay niadto’ng lalaki nga giputlan sa liog. “Gimahal ko ikaw Richard apan walay katumanan ang atong gugma kay mabilanggo na man ko,” ni Lanie.

“Sige na, dad-a na ako sa police station,” matud ni Lanie nga wala na usab makapugong sa iyang paghilak. “No, dili ko ikaw dakpon Lanie. Bisan tuod og ako ang gitahasan sa pagdakop kanimo, dili ka nako dakpon. Alang kanako may rason ka nga imong gipatay ang maong tawo,” matud ni Richard.

Nagakos ni Lanie ang higala niya’ng police detective tungod sa kalipay nga dili siya dakpon ni Richard bisan og gitug-anan niya kini nga siya ang mipatay sa tawo nga milugos kaniya. Gihagkan ni Richard si Lanie ug gialam-alaman.

“Suginli ko sa kinatibuk-ang hitabo Lan,” matud ni Richard. Samtang nagsugilon sa hitabo, gihapohap ni Richard ang dughan sa iyang brand new nga girlfriend. (Sumpayan)