Dili ka ba diay mangayo’g hustisya sa nahitabo nimo, Jezebel?” Nagkanayon si James.
Wala ko makatingog.
Gitutokan ko ni James. Ingon sa nagpaabot siya sa akong tubag sa iyang pangutana. Apan nagpabilin kong nagpakahilom.
“Dili ka ba lang diay maningil sa tawo nga nagpasipala kanimo?” Ang pangutana ni James ingon sa mipahunat sa akong kabubut-on. “I-report nato ang nahitabo nimo ngadto sa kapolisan. Ang mga tinugyanan sa balaud nay bahalang mangita sa nagbinuang nimo.”
“Ayaw na lang, James. Hasol na kaayo. Bahala na ang Diyos nga mosilot nila.” “A-ang buot mong ipasabot..”
“Magpakahilom na lang ko. Tun-an ko na lang ang akong kaugalingon pagdawat sa kamatuoran nga usa ako ka biktima sa rape. Dungan niini, gusto kong kalimtan ang maong mapait nga kasinatian ug magsugod og bag-ong kinabuhi.”
“J-Jezebel...” Tuaw ni James nga ingon sa dili makatuo sa nakab-ot kong desisyon.
Ang tinuod nga hinungdan kun nganong dili na lang ko mosumbong ngadto sa kapolisan bahin sa nahitabo nako mao nga dili ko gustong may lain pang eskandalo nga mahitabo sa akong kinabuhi. Na-eskandalo na ang akong pamilya didto sa Bohol, pun-an pa gyud sa eskandalo nga nahitabo mismo kanako, mura’g subra na. -- Sumpayan pa