Nahigugma na

Dear Tita Salie,

Good day. Ako si Lin, dalaga, nalingaw ko sa akong textmate karon. Ug mao kini ang akong pangayoan kanimo og pagpasabot.

Dugaydugay na ming magkaila sa text, one year na kapin ug suod na kaayo mi bisan kun wala pa mi magkita. Karon nanguyab siya nako. Gikilig ko pag-ayo tungod kay sa tinuod lang magsige na ko og hunahuna kaniya. Sa akong tan-aw nahigugma na ko niya, Tita, bisan sa text lang ang among communication.

Apan bisan love kaayo nako siya apan wala nako siya sugta tungod kay at the back of mind anaa ang pagduda nga tingali kun nagbinuang lang siya.

Unsaon man nako pag-ila nga tinuod siya, Tita Salie? Unsaon usab nako pag-ila ang iyang pagkatawo sa tinuoray. Palihug pasabta ko kun unsay angay nakong buhaton. Daghang salamat sa imong pagtagad.

* * *

Hello Lin,

Nakagusto ko sa imong prinsipyo. Husto gyud kaayo nga una ka makig-relasyon sa usa ka tawo mas maayo gyud nga imo una siyang mailhan aron imong masayran kun unsa gyud ka tinuod ang iyang tinguha diha kanimo. Tungod kay lisod kaayong tuohan ang estorya diha sa selpon lang. Unya mas labing maayo gyud kun imong masinati ang iyang batasan samtang dili pa ulahi ang tanan.

Layo ba gyud mo kaayo sa usa’g-usa nga lisod gyud alang kaninyong duha ang magkita sa personal? Kay kun kaya ra ninyo nga magkita mo, mas labing maayo aron imong mahibaw-an ang tinuod niyang bayhon tungod kay lahi ang tawo sa selpon, lahi ra kini kun sa personal nimong ikaatubang.

Kun kaya sa tawo nga mangilad o mamakak sa atubang mas labi pang dali sa tawo ang pagpamakak sa selpon.

Busa pangita mo og paagi nga magkita mo sa personal aron mo magkailhanay sa tinuoray.

-- Tita Salie