Rape victim

Diha nga nakabiya na ang inahan ni Lanie ug sila na lang duha si Richard. “Ngano nga mianhi ka man sa akong gitrabahoan Richard?” gipangutana ni Lanie ang higala niya nga police detective.

Gikulbaan si Lanie kay naghuna-huna siya nga basin og nahibaw-an na ni Richard nga siya ang nakapatay sa tawo nga milugos kaniya ug iyang gipunggotan sa ulo. “Kuan, gimingaw ko nimo Lan kay kalit ka man lang nga nahanaw didto sa inyo,” pasabot ni Richard.

Wala nay trabaho si Lanie ug wala na usab ang magtiayon niya nga agawon. Si Lanie na lang ug ang kauban niya nga katabang maoy nahabilin sa balay. “Sori kaayo ha, dili ko makapadayon nimo sa balay kay dili man kini amo. Adto na lang ta didto manglingkod sa lingkoranan ilawom sa kahoy,” iyang giingnan si Richard.

“May paglaum ba ko sa akong gugma nimo Lan?” gisukna sa police detective si Lanie. Wala dayon motubag ang dalaga. Taudtaud. “Ang tinuod, nakagusto ko nimo Richard apan dili ako angay nimo kay numero uno, pobre mi. Ikaduha, nabiktima ko og pagpanglugos,” ni Lanie pa nga ingon sa nakahukom nga motug-an na lang g’yud sa nanguyab niya’ng polis.

Nahingangha si Richard nga nakadungog sa gisulti ni Lanie. Nagpakisayod kini apan wala na mohatag og dugang kasayuran si Lanie. “Para kanako Lan, kun tinuod man nga nabiktima ka og pagpanglugos, dili nimo kini kabubot-on ug dili nako kini igsapayan,” matud ni Richard.

Ingon sa katuohon-dili si Lanie kun tinuod ba nga nahigugma gihapon kaniya si Richard bisan og nasayod kini nga biktima siya sa pagpanglugos. “Mopauli ko sa bukid unya sa Sabado, gusto ko nga magkita ta kay may itug-an ko nimo Richard,” ni Lanie pa. (Sumpayan)