Hulmigas

Miigot ang mga ligid sa bag-ong HILUX nilang Lendo-Sita dihang hapit na sila muabot sa traffic light. Unsaon, bisa’g caution pa ang nagsiga, kalit man lang namarog ang nagpungko nga mga batang bulingit sa center island ug paspas nga nagpatunga sa karsada bitbit ang mga basiyong plastic bottle sa mineral water.

Nahayblad si Lendo nga nagyatak pa gihapon sa brake nga miabli sa bentana. Miulbo ang nagdilaab nga kasuko: “Hoy, mga hulmigas, nagpasad na sab mo dinhi, ha?”

Hulmigas ang itawag ni Lendo niining mga nagpakilimos nga bata, kinsa anha gyud magtapok pirme sa may mga interseksiyon nga adunay traffic light. Naobserbaran niya nga kun usa kanila mangayo, unya hatagan ... ang uban mosunod pud ug magpanon sa pagpangayo. Mamugos ra ba bisa’g gibalibaran na. Ug kun dili hatagan, sekretoon sa paggarasgaras sa mga tonto ang lawas sa sakyanan.

“Hoy, ikaw tong migaras sa akong sakyanan sa miaging Lunes, no?” Singka ni Lendo pagkadeparar niya sa batang babaye nga mibukhad sa palad niini aron mangayo’g kuwarta.

Daw gipanglimutan si Lendo. Sa hinurot nga kusog, gitamparos niya ang bata, kinsa maayo kaayong pagkahapla sa dalan. Tayming sab nga ang signal, ‘GO’ na, mipasirit dayon siya pagpadagan sa ilang HILUX. Apan may milagubo. Aduna poy napusgay. Nakasiyagit sa kakuyaw ang iyang asawa nga diha maglingkod sa iyang tupad.

Napugos si Lendo sa pagpadaplin ug pagpahunong sa ilang sakyanan. Puwerteng sigaha  sa iyang mga mata pagkakita niya nga labihang lumpinga sa kilid sa ilang HILUX ug napusgay pa gyud ang tibuok bildo niini nga agi sa mga dagkong bato nga gilabay. Gukdon unta niya ang mga bata, apan wala na kini sa ilang nahimutangan.

Naigking si Lendo dihang may hulmigas nga mipaak sa iyang bukton. Napun-ag laing kalagot ang iyang kasuko. Gipusa sa iyang palad ang insekto hangtod namatay. Apan ang kangutngot nga gibilin sa pinaakan niini  naghatag niya’g mensahe: “Bation sab diay sa tawo ang dugay’ng kangulngol kun ang hulmigas nay mamahit. (Kataposan)