Kamatayon sa usa ka pari

Patay na diay si Padre Jurad? Wa pa man tingali to siya’y saysinta?” ni Mira ngadtong Dinda. Nag-atubang sila’g lingkod sulod sa sala sa balay ni Mira.

“Singkuwenta i siyete pa,” ni Dinda. Nakapanakla si Mira.

“Unsa may sakit?” ni Mira.

“Cancer sa colon,” ni Dinda. Masulob-on ang nawong. Suod niya ang maong pari. Daghan siya’g utang kabubut-on sa nitaliwan.

Nibisita si Dinda ni Mira ning buntaga mahitungod sa laraw ni Mira nga ma-repair ang atop sa balaybalay sa menteryo diin tua ang mga nitso sa mga ginikanan ni Mira. Unya pagkahuman sa ilang sabot, nalakbitan ang pari sa ilang tsikatsika. Si Dinda man ang sinaligan sa simbahan para sa mga kalihokan sa menteryo. May mga panday man siyang gigunitan. Karong nagsingabot na ang Kalag-kalag, nagdali si Mira nga ma-repair ang naguba sa bagyong Yolanda.

“Di ba ang pari suod man unta sa Ginoo? Nganong mubo ra man og kinabuhi si Padre Jurad?” ni Mira.

“Bisa’g pari siya, di man healthy iyang lifestyle. Kusog man siyang moinom ug manigarilyo, ni Dinda.

“Kun kana lang bisyoha, naseguro ko nga dili siya kastiguhon sa Diyos ana. Duna gyud tingali laing bisyo,” ni Mira.

“Unsay buot nimong ipasabot,” ni Dinda. Naisang kilay.

“Well, suod man ka’s pari. Ikaw mismo nasayod kun tinuod ba ang mga tsismis,” ni Mira.

“Tikop akong baba anang butanga, Mir. Kun may sala man ang pari, siya ray manubag ana sa Diyos!” ni Dinda.

“Akong duda, Din, ang hinungdan nga masakit ang tawo, kun dunay nagsibag sa iyang pagkatawo,” ni Mira.

“Unsa man pananglitan?” ni Dinda.

“Kanang magsangyaw ka’s mga tawo nga maglikay sila sa sala. Unya ikaw mismong nagsangyaw, naglunang sa sala,” ni Mira. Wa na gyud katingog si Dinda.

Baniog sa tibuok lungsod ang relasyon sa pari ug sa leader sa choir nga usa ka babayeng minyo.

Dugay’ng kahilom.

“Aw, adto na lang ko, Mir. Human na man diay ang akong tuyo nimo. Sa wa pay kalag-kalag, ipasalig nako nimo. Mahuman imong gipatrabaho. Unya mokubra na sab ko’s balanse sa contract price,” ni Dinda. Nitindog.

“Segurado” Mira. Gisundan niya’g tan-aw ang bukobuko sa bisita nga nigawas sa pultahan. Ug nitindog siya aron paghuman sa iyang gidigamo sa kusina. (Kataposan)