Goodbye Maricel

Giabi-abi pag-ayo ni Albino si Maricel. Nakamatikod si Albino nga ang iyang inahan nagsige og tutok kang Maricel. Masabot kaayo sa iyang linihokan nga wala kini mahimutang.

Gidad-an sa inahan ni Albino og juice sila si Maricel aron kalingawan samtang nagsultihanay didto sa lawn sa ilang balay. “Susama ka g’yud og panagway sa anak sa akong kumare,” giingnan sa inahan ni Albino si Maricel.

Nakabantay si Albino nga miduko si Maricel. “Dili ka ba anak ni mare Janice? Ang kumare nako nga taga Barangay Day-as?” misamot nga miduko ug wala magtingog si Maricel nga gipangutana sa inahan ni Albino.

Wala na lang mamugos ang inahan sa ulitawo. Mibiya kini nga ingon sa salabtonon kaayo ang linihokan. Gisundan paglantaw ni Albino ang iyang inahan.

“Kaila diay ni mama ang imong inahan Mar? Kumare diay sila? Kun mao kana, wala nay problema kun magkadayon ta kay magkumare na sila’ng daan,” komedya ni Albino.

Nabantayan ni Albino nga may gitawgan sa cellphone ang iyang inahan. Taud-taud, mibalik kini sa nahimutangan nila ni Albino ug Maricel. “Albino, si Maricel ba kadto ang ngalan niini’ng imong kauban?”

Abtik kaayo nga nakayango si Albino nga daw gibati na og kahibulong. “Daan pa lagi ko, siya ang anak ni kumare Janice nga usa ka bayot,” matud sa inahan ni Albino nga mitutok pag-ayo kang Maricel.

Miduko si Maricel ug naghilak. Nangayo kini’g pasaylo kang Albino nga wala magtug-an nga dili g’yud siya matuod nga babaye. Wala masayod si Albino kun unsay iyang pagabuhaton.

Nananghid si Maricel nga mopauli na ug luhaan ang duha niini ka mga mata. “Molakaw na ko Al, salamat sa pag-invite mo nako ug dia ang akong gift nimo. Happy birthday,” ni Maricel dayong lakaw.

Natulala si Albino. “Goodbye Maricel!” singgit ni Albino kang Maricel nga nagkalayo. (Kataposan)