Jezebel

Gula 80

Pag-abot nako sa boarding house, midiretso ko sa akong kuwarto ug nag-ilis. Unya miadto ko sa banyo ug naligo. Pagkahuman, nangareglar ko sa kaugalingon.

Nag-ilis og limpiyong sapot ug miadto sa eskuwelahan aron magpa-enroll. Taas na kaayo ang linya sa mga estudyante nga magpa-enroll sa akong pag-abot.

Nagpunsisok ug nagyagaw lang ang mga estudyante sulod sa eskuwelahan nga nagpahigayon sa pagproseso sa ilang enrollment form. Ang uban nga nasayo hapit na mahuman sa pagpa-enroll. Nagtuo kong dili gyud ko makahuman og dali kay mao pa may akong pagsugod sa taas nga proseso sa pagpa-enroll.

Bisan sa kakuti sa pagpa-enroll, nakahuman gyud ko nianang pagka-alas kuwatro sa hapon. Nagdali kong mipauli sa boarding house ug nanghipos sa akong mga gamit. May taas pa kong panahon. Kun dili ko makaabot sa biyahe sa bus sa 4:30, mao na lay akong sakyan ang biyahe sa alas sayis paingon sa among lungsod sa Mabini.

Human makapang-hipos sa akong mga dad-onon, nananghid ko sa akong landlady nga mopauli na ko.

Gibayran ko na usab daan ang room nga akong giokupar aron ako gihapon ang mopuyo niini sa second semester.

Paggawas nako sa boarding house, mitingog ang message alert tone sa akong cellphone. Si Edward ang nag-text. – Sumpayan pa