Nahimuot gyud ko anang anak nimo nga si Kid, Nang Luming,” matud ni Karin. “Pila na bay edad niana?” “Trese, ngano man diay?”
“Sus! Giingnan ko, nang nga mangasawa siya nako.”
“Ha! Tinuod?” Nahikatawa si Luming. “Unya, unsa may imong tubag?”
“Ako siyang giingnan nga “Bata ka pa, Kid, unya na lang inigdako nimo.”
“Pila na man diay imong edad,” nangutana siya nako. “Desi otso,” akong tubag.
“Unya, unsay iyang sulti?” matud ni Luming.
“Iya ko’ng giingnan nga, ‘Sige ha, huwata ko inigdako nako kay akong ingnon si mama nga magminyo na ko.”
Dugay na kadto. Ulitawo na si Kid ug tapos na sa pagka mechanical engineer. Wala na usab si Karin sa Cebu ug may balita nga tua na sa Manila ug masakiton.
“Kid, nganong kanunay ka mang maghinuktok? Unsa may imong problema? Sultihi ako,” pangutana ni Luming.
“Akong gihunahuna si Karin, Ma, kun hain na intawon siya karon!”
“Nganong si Karin man ang imong gihunahuna nga kadaghan man nga babaye diha. Naa si Lanie, si Eden o kaha si Fe.”
“Mahal ko si Karin, Ma, sukad pa kaniadto sa gamay pa ko. Dili ko mahimutang kun dili ko siya makita. Misaad usab siya nga iya ko’ng hulaton.”
“Motuo ka man sa iyang saad, Kid, nga kadugay na ato. Basin kapila na to maminyo si Karin, Kid.”
“Pangitaon ko lang gyud si Karin, ma. Adtuon nako’s Manila kay tua man kuno didto.”
“Na, hala, kun maoy imong gusto, di ko ikaw pugngan.”
Milarga si Kid paingon sa Manila ug nakita niya si Karin sa ospital sa PGH. May sakit kini sa baga. Daot na kaayo kini ug hapit wala na kaila si Kid niini. Apan sa dihang nailhan niya kini, iya kining gigakos.
“Karin! Karin! Misaad ka nga imo ko’ng hulaton,” ni Kid kansang mga luha midaligdig sa iyang mga aping.
“Ikaw ba si Kid? Sus, kaguwapo na nimo, Kid! Liwat ka man gyud ni papa nimo. Gihulat ko ikaw, Kid, apan nasakit ako. Ambot may kaayuhan pa ba ni!”
“Ayuhon ka sa akong pagmahal, Karin, buhion ka sa akong paghigugma. Sukli ang imong sakit ug pagpakabuhi alang sa akong gugma.”
“Oo, Kid, oo!” ni Karin nga migakos paghugot sa ulitawo.
Sa maayong pagkaon ug hustong medisina, mibaskog si Karin paglabay sa mga adlaw. Sa pagduaw ni Kid, usa ka adlaw, “Mamauli ta sa Cebu, Karin, ug sultihan nako si mama nga magminyo na ko.” (Katapusan)