Dear Tita Salie,
Hi and how are you? Tagoa lang ko sa pangalan nga Mr. W, minyo, dunay tulo ka buok mga anak apan bulag sa asawa, ania ko nagpuyo sa Danao City.
Duna koy karelasyon karon nga usa ka dalaga. Bisan sa akong sitwasyon apan love kaayo namo ang usa’g-usa. Ug love na pod sa akong uyab ang akong mga anak kay ania man nako ang tulo ka mga bata.
Ang problema nako, Tita Salie, kay kasado man god ko sa akong asawa. Dili pa ko puyde makigminyo niining akong uyab bisan gusto ug andam na unta mi. Unsa may angayan namong buhaton? Palihog pasabta ko kay maghulat gyod ko sa imong tambag dinhi sa Banat News. Daghang salamat and God bless.
* * *
Hello, Mr. W.
Tinuod gyod nga dili pa gyod puyde nga makigminyo ka og laing babaye tungod kay duna man kay pinirmahan sa una sa imong kasal ug usa kadto ka lifetime contract.
Wala moy laing mahimo gawas sa pag-file og annulment ug pagpaabot nga mahuman ang proseso niini. Apan ang pag-process niini dili sayon nga buhaton tungod kay gawas nga medyo dugay gyod kini mogasto ka usab og dakudako nga kantidad.
Kinahanglan gyod nga mosunod ka sa maong proseso kun gusto nimo nga minyoan ug pakaslan ang imong hinigugma karon. Kay dinhi gyod sa atoa medyo estrikto ta mahitungod niini kay dili ka gyod makasal kun wala kay certificate of No Marriage or “CENOMAR” nga ikasumiter.
Usahay mao usab kini ang hinungdan kun nganong ang uban magpuyopuyo lang. -- Tita Salie