Mahigalaon sa chicks

Gula 5

Mipauli si Elmer sa ilang balay sa Barangay Poblacion, Balamban apan nagsabot sila si Grace nga mamista sila sa Hingatmonan inigkaugma. Nakapahiyom si Elmer nga naghuna-huna sa iyang kasinatian niini nga adlawa. Wala magdahom si Elmer nga magkaamiga sila si Grace nga kababayan ra niya sa Balamban. Wala gayud siya masayop sa iyang gihimo nga gipakitaan niya og maayo nga pagtagad ang dalaga diha nga naglisod kini sa pagsakay sa bus pauli sa ilang lungsod.

Nakatulog si Elmer. Wala tuyoa nga gidamgo niya si Grace taliwala sa iyang katulogon. Sa iyang damgo nagkahigugmaay sila si Grace ug nanuroy sila niadtong mingaw kaayo nga dapit nga nag-umbang sa dagat ug talisawop ang adlaw. Romantic kaayo ang mao nga esena.

Gihagkan ni Elmer si Grace apan kalit lang nga mihilak ang dalaga. Nahigmata si Elmer. Nahinumdom si Elmer sa gisulti sa iyang apohan nga kun magdamgo ang usa ka tawo sa iyang kaila, balihon lang niini ang unlan aron ang hingtungdan magdamgo usab kanimo.

Gibali tuod ni Elmer ang iyang unlan ug gipiyong pagbalik ang iyang mga mata. Takulahaw lang nga gidagit na usab siya sa limbo sa katulogon. Gidamgo na usab ni Elmer si Grace. Sa iyang damgo, nagpagakos ug nagpahawok na kaniya si Grace kaniya.

Malipayon kaayo sila sa ilang relasyon. Apan wala masayod si Elmer kun diin kadto nga dapit nga ilang giadtoan ni Grace.

Pagmata ni Elmer pagkabuntag, nahuna-huna dayon niya ang iyang damgo. Nakapahiyom siya.

Human makakaon, naligo si Elmer ug nag-ilis aron pag-adto sa Barangay Hingatmonan. Dili niya pakyason ang pagdapit ni Grace nga mamista. Pag-abot ni Elmer sa ilang balay ni Grace, gisugat siya sa nagpahiyom nga dalaga. “Bunga sa kakapoy Mer, gidamgo baya tika kagabii,” ni Grace pa.

  Ingon sa dili makatuo si Elmer sa iyang nadungog. (Sumpayan)