Jezebel
Gula 50
Nagpadayon pa gihapon ang pagpanuktok didto sa front door. Sa akong banabana, nakagawas na si Edward sa pultahan sa kosina. Migawas ko sa akong kuwarto human makailis. Mitadlas ko sa sala aron ablihan ang pultahan sa atubangan sa balay. Pagkatukas sa palid, mibantang sa akong atubangan ang bayhon ni Nanay Ludy.
“Kadugay ba nimong nakaabli, Jezebel?” may diyotay’ng kagahi ang tingog ni Nanay.
“Nakatulog ko, Nay,” namakak ko. “Sorry, Nay.” “Wa pa ba mahiuli si Tatay mo?”
“W-wa pa man, Nay...”
“Hubog na sab tingali kadtong kanahan.”
“Sagdi lang gud na si tatay, nay. Iya man nang kalipay. Wa man bitaw ta pasagdi. Wa man siya magkuwang nato.”
Nahilom si Nanay. Iya kong gibiyaan sa sala. Misulod siya sa kuwarto nila ni Tatay. Misulod na lang sab ko sa akong kuwarto ug mihigda. Samtang naghigda, maoy akong gihunahuna ang nahitabo dili pa lang dugay. Gikuyawan ko karon nga naghunahuna nga hapit gyud mi masakpi si Edward sa akong inahan.
Pagkaugma, nagkita mi si Edward sa school. Nagpakisayod siya nako kun unsay nahitabo sa among balay sa iyang pagsibat agi sa pultahan sa kosina. -- Sumpayan pa
- Latest
