Mangtas nga barangan

Nidanguyngoy sa paghilak si Roda nga nagpakiluoy ni Basyong nga pakaslan siya tungod kay nagsabak kini. Gani niluhod intawon atubangan sa ulitawo basin maluoy pa kaniya.

Apan nasayop si Roda sa iyang pangagpas kay igo lang siyang gipahilak ug wala siya’y mapaabot nga kaluoy gikan ni Basyong. Wa matagbaw may lain na pud siyang gipahilak. Gani giampo na siya nga magabaan sa iyang gibuhat.

Pagka sunod adlaw may plano na si Basyong nga biktimahun ang dalaga nga si Doray nga anak sa gidungog nga mangtas nga barangan, silingan ra sab sa ilang baryo.

Ug wala siya mapakyas, kay na biktima na usab ug gibiyaan lang sab dayon. Dinhi nagsugod ang kamangtas sa anak sa barangan.

Pasado alas 8:00 sa buntag. Si Basyong rang usa sa ilang panimalay, kay nisimba ang iyang mga ginikanan sa lungsod. Apan sa kalit nagkaanam og kahigos ang tibuok niyang kalawasan. Dangta’g pipila ka gutlo may nigawas sa duha ka bangag sa mga dalunggan nga berde nga mga ulod ug ilong ni Basyong. Pagkataudtaod may lain siyang gipamati, tungod kay may nigimok sa iyang mga mata hangtud nga pulos na berde ang iyang panan-aw sa palibot. Ug wa magdugay may nanuktok sa pultahan.

“Doray, ikaw?” ni Basyong nga nakuyawan.

“Basyong, dili lalim nga pasakitan dili ba? Ug maayong masayod ka nga dili na maulian ang imong panan-aw nga pulos berde. Nasayod ka ba nga gaba na kini sa mga babaye nga imong gipahilak?” ni Doray nga nikagot ang mga ngipon.

“Pasayloa intawon ko!” ni Basyong nga nagbasol.

“Maayong mahibawo ka ... nga ako ang rayna sa mga berde nga ulod. Ug ako ang mangtas nga barangan!’ ni Doray nga nibahakhak sa pagkatawa. (Kataposan)