Bunga sa kalooy

Gula 6

Nakasabot si Ronnie nga dili g'yud diay kabubut-on ni Star nga mahimo siya nga "Magdalena" nga nagbaligya sa iyang dungog ngadto sa mga lalaki.

Gisukit-sukit pag-ayo ni Ronnie si Star ug gisaysay sa dalaga ang iyang kaagi. Sa ngadto-ngadto gitug-an pa gani ni Star ang tinuod niya nga ngalan ug ang dapit nga iyang gigikanan.

Anam-anam nga nakumbinsir g'yud si Ronnie nga si Star tinuod nga biktima lang sa kahigayonan. Nasabtan ni Ronnie ang tinguha ni Star nga mogawas na sa trabaho nga iyang nasudlan apan ang problema mao nga kuwang pa siya og kuwarta. Naghinuktok si Ronnie. Taud-taud, misantop sa iyang huna-huna nga tanyagan si Star nga adto kini papuy-on sa giabangan niya nga apartment. "Kun gusto nimo Star, gikan dinhi adto ka na mopuyo sa akong apartment," matud ni Ronnie.

"Ha? Unsay buot mo nga ipasabot?" natingala si Star ug wala makasabot sa gisulti kaniya ni Ronnie. "Mag-unsa man ko didto sa imong apartment?" dugang ni Star nga mitutok ni Ronnie.

Gihapuhap ni Ronnie ang hamis kaayo nga buko-buko ni Star. "Kun mosugot ka, mag-live in na lang ta. Isaad lang kanako nga sa atong panag-uban magbinuotan ka ug isipon mo nga ikaw maoy akong asawa," giingnan ni Ronnie si Star. Wala damha ni Ronnie nga ang gisulti niya kang Star nakapahilak sa dalaga. Naglibog si Ronnie kun hain nga punto nga nakapasakit siya ni Star. "Sori, sori kaayo kun nakasulti ko og masakit Star. Duna ba?" sukna ni Ronnie.

"Wala ka makapasakit nako. Gani nakahilak ako sa kalipay nga bisan sa akong kahimtang karon duna pa diay lalaki nga mibati og kaluoy," ni Star nga mipahid sa iyang mga luha.

"Tungod sa imong kabuotan Star, dali ra kaayo ako nga mibati og gugma kanimo. Dili ka angay nga mopadayon sa imong kahimtang. Tabangan ko ikaw nga makabangon sa imong paghisukamod," matud ni Ronnie. (Sumpayan)