“Hi Charisse!” gisangpit ni Larry ang dalaga samtang nagsud-ong kini sa mga nangagi nga sakyanan. Paglingi niini, midalit kini og mapinanggaon kaayo nga pahiyom ngadto ni Larry. “Na-surpresa ka ba sa akong pagbisita? Wala man gud ko’y lingaw sa balay ug nakahandom ko sa namingawan nako nga amigo,” ni Charisse. “Bitaw, nasurpresa g’yud ko sa kalit nimo nga pagbisita apan gikalipay nako nga nagkakita ta pag-usab Char,” matud ni Larry nga mibawos pagpahiyom ngadto sa dalaga. Nakasabot siya nga gusto makigpanuroy si Charisse niini’ng higayona.
“Tana, mangaon usa ta kay gibati ‘sab ko og kagutom,” giingnan ni Larry si Charisse dungan sa pag-agbay sa dalaga. Nanulod sila og kan-anan ug samtang nagpaabot sa ilang giorder nagkalingaw og sultihanay.
Gipasabot ni Larry si Charisse nga dugay ra unta siya nga gusto nga magkita sila pag-usab apan ang problema kay walay cellphone si Charisse ug wala usab siya makatultol sa ilang panimalay. “Sori kaayo Lar ha, unsaon pobre man gud mi mao nga wala g’yud tawon ko makapalit og selpon,” pasabot ni Charisse.
May nahuna-hunaan si Larry. Duha ang iyang selpon ug nakahuna-huna siya nga ihatag ang usa kang Charisse aron duna sila’y kontak. Puwerte’ng lipaya ni Charisse diha nga gisultihan siya ni Larry nga ihatag kaniya ang usa niini ka selpon.
“Kauwaw ani uy, gitabangan pa ko nimo unya karon ihatag pa g’yud nimo nako ang imong usa ka selpon,” matud ni Charisse nga misamot kaparaygon ang tinan-awan. “Guniti daan kini’ng selpon kay palitan nato kana og simpak iniggawas nato dinhi sa restaurant,” giingnan ni Larry si Charisse.
Nanuroy sila kadiyot sa department store sa dalan Colon. Gituyo ni Larry nga moadto sila sa nahimutangan sa mga chocolate. Ingon sa miduko sa Charisse nga tingali nakahinumdom sa iyang gihimo pipila ka semana ang milabay.
“Hatagi ko og tulo ka chocolate miss,” giingnan ni Larry ang tindera. Human niya kabayari, gihatag ni Larry ang chocolate kang Charisse. (Sumpayan)