Nasulod sa bulsa

Papalita ko’g init nga iro, Day sa lalaki nga kuwarentahon og pangidaron. Niduol rong buntaga sa barbecue stand ni Vencia ang lalaki. May kuyog ang lalaki nga batang babaye, 8 anyos ang pangedaron. Nagtudlo ang bata sa baligya ni Vencia ibabaw sa gamay’ng lamesa.

“Ha? Wa gyud tawon ko magbaligya’g iro, sir! Bisa’g kanding pa, wa” ni Vencia. Nangugat. Naisang kilay nga nagtutok sa customer. Nipahiyom lang niya ang lalaki. Wa nilakaw. Nagpabiling nagbarog ug ang bata atubangan ni Vencia.

Sobra usa ka tuig nang naninda si Vencia og barbekyu, puso ug lainlaing matang sa soriso sa eskina sa mga dalang Rosales ug Borja. May lamesa siyang gamay displihanan sa iyang mga baligya, di layo luyo sa barangay hall sa baryo Inoga ning dakbayan. Mga trayenta metros padulong sa kasadpan, nahimutang ang gate sa Inoga Elementary School.

Napugos si Vencia og paninda aron may kabuhian. Kay usa ka tuig na siyang way komunikasyon sa iyang bana nga si Miguel. Nananghid si Miguel niya nga muadto’g Manila kuyog sa iyang mga kaubang panday. Kay giagni sila’g usa ka enhinyero nga dunay dakong construction didto. Ug dagko kuno sila’g suweldo. Sukad adto, wa na gyuy balita kon naunsa na si Miguel. Nagtungha sa grade one si Larry ilang bugtong anak. Busa, naningkamot si Vencia alang sa kaugmaon ni Larry nga nagtungha na sa Inoga Elementary School.

“Kana diay, Nang?!” sa batang babaye nga kauban sa lalaki. Nagtudlo ang bata sa tuskig, tanus, pula nga soriso, usa ka dangaw ang gitas-on ibabaw sa lamesa.

“Hot dog man, na!” ni Vencia.

“Mao bitaw. Kon Binisay-on, init nga iro” sa lalaki.

“Gibinisaya man diay nimo” ni Vencia. Nakapangawot sa ulo. Nagpahiyom nga maulawon.

“Pila ka buok imong paliton, sir?” ni Vencia nga nidalig kuha og kimpit ug plastic. Nagrigor iyang hunahuna nga maayo niyang pagkasulod sa bulsa sa tawo. (Katapusan)