Sulagma

Gula 5

Wala g’yud mobalibad si Konsehal Melgo diha nga gihangyo siya ni Rex nga tabangan nila si Marian nga makagamit sila sa ambulansya sa lungsod pagpauli sa iyang inahan gikan sa ospital.

 “Patubilan lang nako og gasolina ang ambulansya konsehal,” giingnan ni Rex ang mapahiyumon nga konsehal sa Borbon. “Walay problema kay nagpaingon man dinhi sa siyudad ang ambulansya kay dunay gihatod nga pasyente, pabor na kaayo sa pauli,” matud sa konsehal.

Diha nga nagdagan na ang ambulansya nga gisakyan sa inahan ni Marian balik sa Borbon, dako kaayo ang pagpasalamat ni Marian ngadto sa higala niya nga si Rex. “Kon wala pa kita magkaila Rex, sigurado nga magkalisud-lisod ko sa pag-atiman ni Mama,” ni Marian.

“Salamat kaayo sa imong pagtabang namo dong ha,” matud sa inahan ni Marian diha nga miabot na sila didto sa ilang balay sa Barangay Lugo. “Bukas kanunay kini’ng among balay kanimo dong,” dugang sa inahan ni Marian.

Dunay babaye nga miabot. Ig-agaw diay ni Marian nga nagpahibalo nga adunay disco inigka gabii sa Barangay Laaw, sakop gihapon sa Borbon. “Mang-disco ta Rex,” matud ni Marian. “Oo ba, sugot kaayo ko,” dali nga tubag ni Rex.

Mibiya ang ig-agaw ni Marian human gipasaligan sa dalaga nga moadto sila si Rex inigka gabii. “Maghuwat mi gaw,” matud sa ig-agaw ni Marian.

Wala na mouli si Rex sa ilang dapit sa Barangay Sagay. Human nila og panihapon ni Marian, nananghid sila nga moadto na sa disco. Suod na kaayo sila nga mora’g daan na nga managhigala.

Giagbayan ni Rex si Marian ug gibaliwala lang kini sa dalaga. Sa hilom gikalipay kaayo kini ni Rex nga nakabatyag nga may hilom siya nga pagbati kang Marian. “Hala Rex, baga man diay kaayo ang dag-um,” ni Marian pa nga nagpanghangad sa kawanangan.

Kalit lang migisi sa kawanangan ang hait kaayong kilat ug gisundan sa sipa kaayo’ng dugdog. (Sumpayan)