Mingawon

Dear Tita Salie,

Maayong adlaw. Tawga lang ko sa pangalan nga Julo, ulitawo apan nagproblema mahitungod sa gugma.

Duna man gud koy uyab, Tita Salie, nga duha nay anak sa iyang uyab sa una. Ug ang ilang anak tua karon sa amahan.

Kining akong uyab magsige lang gihapon og adto sa balay sa iyang uyab sa una kay ang iyang rason tungod sa bata. Mingawon kuno siya sa iyang anak. Pero nasayod ko, Tita, nga magsige sila og estorya sa amahan sa iyang anak bisan matud niya nga wala na sila. Unya dili pa ko niya paadtoon sa ilahang balay kay basin kuno og unsay ikasulti sa amahan sa iyang anak.

Husto pa ba kining iyang gibuhat, Tita Salie?

* **

Hello Julo,

Maayong adlaw dili gyud sayon kon kita makigrelasyon sa tawo nga dunay kagahapon labi na kon aduna pa sila’y communication sa tawo nga nahilambigit kaniya sa iyang kagahapon.

Dili gyod nato kalikayan nga magduda nila and of course medyo insecure  ka tungod kay nag-una man siya sa kinabuhi sa atong karelasyon. Mao nga nakasabot ko nimo, Julo.

Ug base sa imong gisaysay makaingon pud ko nga tingali kon duna pa gyu’y  something kanilang duha tungod kay dili man ka pakuyogon kay mahadlok siya nga malain ang amahan sa iyang anak. Kay kon ang iya lang anak ang iyang tuyo dili na unta siya mahadlok kon unsay bation sa amahan sa iyang anak kon tinuod nga wala na gyud sila.

Kon ang bata lang ang iyang tuyo, mosugot unta siya nga mokuyog ka niya sa pagbisita sa iyang anak. O puwede niya isuroy ang iyang anak ug kamong tulo ang manuroy kay ikaw ra man kaha ang iyang hinigugma.

Mas maayo nga imo siyang estoryahon parti niini kay unfair kini sa imong part, Julo. -- Tita Salie