Gula 19
“Nanguyab ba nimo si Jerome, Jezebel?” Sukit ni Edward.
Wala dayon ko makatingog.
Taudtaod kong naghunahuna. Akong gitimbangtimbang kon angay ba nakong sultihan si Edward sa matuod nga nanguyab si Jerome nako.
“Nagpaabot ko sa imong tubag, Jezebel,” gikan ni Edward. “Tug-ani ko sa tinuod. Nanguyab ba si Jerome nimo?”
“Wala,” nakahukom kong bakakan si Edward aron dili na siya magdaghan pag kuti-kuti. “Wala mangulitawo si Jerome nako.”
“Pero nganong nagkuyog man mo ganina?”
“Sulagma lang kadtong maong hitabo. Naabtan ko siya nga nagbarog-barog sa usa ka eskina maong nagkuyog na lang kami paingon dinhi sa eskuwelahan.
“Tingali’g gituyo gyud niya nga hulaton ka sa usa ka eskina aron magkakuyog mo?”
“Sobra ra man sab nang imong kamadudahon. Wala ka bay pagsalig nako?”
“Dili sa ingon niana, Jezebel...”
“Pwes, wala ikaw’y angay kabalak-an. Kon may pagsalig ka nako, laomi nga ikaw ray lalaki sa akong kinabuhi.
Dili ko mangita’g lain tungod kay anaa ka na. Kon dili man gyud kalikayan nga may laing lalaki nga mangulitawo nako sanglit usa man ako ka dalaga.” -- Sumpayan pa