Jezebel - Gula 17
“Dili ko magpakawala sa paglaom, Jezebel,” ni Jerome pa, “samtang dili pa kamo makasal. Samtang dalaga ka pa, may kagawasan pa ang si bisan kinsang lalaki sa pagpangulitawo nimo, sa pagpangindahay sa imong gugma.”
“Pero wala ka nay makuha gikan nako. Si Edward ang akong gihigugma. Nagtuo kong soulmate kami ug siya nay akong pakaslan inig-abot sa hustong panahon.”
“I believe in destiny, Jezebel. Bisan dili kita karon ang nagkarelasyon, apan kon kita ang gitagana sa kahitas-an alang sa usa’g-usa, kita gyud ang magkadayon inig-abot sa hustong panahon. Ug mao kana ang akong gilaoman.”
Naputol ang among panagsulti dihang nahiabot na kami sa eskuwelahan. Mitipon ko sa mga classmate kong babaye nga nagtapok diha sa may plasa sa eskuwelahan. Si Jerome miduol usab sa mga classmate namong lalaki nga naghut-ong usab og ila. Wala ko pa makita sa maong hut-ong si Edward. Hain man kaha siya?
Nagsugod na ang klase. Nag-ulhos mi’g sulod sa classroom. Nakita ko na si Edward nga nagmug-ot ang nawong nga misulod sa lawak-saringan. Dihang nagkatagbo ang among mga tinan-awan, nasuta ko nga masulob-on ang iyang panagway.
Pag-abot sa among vacant period, nangita ko’g paagi nga magkasulti kami si Edward. -- Sumpayan pa
- Latest
