Sagbay-luwag

Samtang nalingaw ang dalagita sa pagpindot-pindot sa iyang selpon, nakahigayon si Narding sa pagtutok sa hamis ug puti kaayo niini nga paa. Nakapanglad-ok sa iyang laway si Narding samtang wala’y pupamilok nga mitutok sa paa sa dalagita.

Nag-ilusyon si Narding nga kun mahitabo nga ang maong dalagita iyang makauban sa usa ka dapit nga sila ra’ng duha, dili gayud niya palabyon ang higayon ug angkonon gayud niya kini sa makadaghan nga higayon.

Miundang pagtutok si Narding diha nga milingi kaniya ang dalagita pagkahuman niini og pindot-pindot sa iyang selpon. Mora’g adunay giteksan ang  dalagita. Nakahuna-huna si Narding nga tanyagan niya’g snack ang maanyag nga dalagita.

“Miss…. Basin pwede ko makadalit nimo og snacks mentras may gipaabot ka pa? Pagpili lang kay ako ra’y bayad,” iyang giingnan ang dalagita.

Gipahiyoman si Narding sa dalagita ug misamot ang iyang kaanyag. “Day, hatagi ra kini si miss sa iyang order kay ako ra’y mobayad,” giingnan ni Narding ang tindera sa bakeshop. Nag-ukon-ukon ang dalagita kay ingon sa gibati kini og kauwaw.

Tuod, mitindog ang dalagita og miorder og duha ka slice sa cake ug orange. “Salamat kaayo ha?” matud sa dalagita diha’ng milingkod na kini pagbalik sa lingkoranan nga tupad ra sa lamesa ni Narding.

“May gipaabot ka?” gisukna ni Narding ang dalagita. Miyango ang dalagita. “Lagot kaayo uy. Akong ig-agaw ang akong gihuwat kay manghuwam ko niya’g kuwarta,” matud sa dalagita.

Wala dayon motingog si Narding. Iyang gitutokan ang dalagita nga sa iyang pagsabot, dili ordinaryo og pamilya kay puti ug hamis kaayo’g pamanit. “Ngano nga manghuwam ka man og kuwarta, wala ka diay mangayo sa imong daddy?” ni Narding pa. “Maayo ka no kay daghan kaayo ka’g kuwarta,” matud sa dalagita.

“Giunsa nimo pagkasayod?” bawos-pangutana ni Narding. “Nakakita ko ganina diha nga gihabwa nimo ang imong kuwarta sa pitaka, daghan kaayo ka’g kuwarta,” giingnan si Narding sa dalagita. (Sumpayan)