Dili na maihap

Dear Tita Salie

Maayong adlaw. Tagoa lang ko sa ngalan nga Ms. Leonor. I am 28 years of age, dunay unom ka buok mga anak apan dili mi kasado niining akong partner. Ug ania kami manimuyo sa Mandaue City.

Mahal kaayo nako kining akong partner. Ug mao kini ang hinungdan kun nganong ania lang gihapon ko nagpabilin sa iyang kiliran.

Dili na nako maihap, Tita Salie, kun kapila nako limbongi niining lalakiha. Sobra gyod ang iyang pagkahimabaye. Wala pay trabaho unya mogamit pa gyod og druga.

Usahay makaingon ko nga buang gyod ko kay nganong nipilit ko niining lalakiha nga kun akong hunahunaon wala gyoy kuwenta. Karon ako na usab nga nasayran nga duna na say lain nga gikabuangan. Unsa may akong buhaton, Tita Salie? Magpabilin pa kaha ko sa iyang kiliran? Palihog pasabta ko. Salamat.

* * *

Maayong adlaw, Ms. Leonor. Ang maayo gyod unta nga imong gibuhat nga wala unta nimo daghana ang imong anak kay nasayod ka man nga iresponsable ang imong partner. Wala unta nimo siya paundayoni sa iyang gusto kondili siya magbag-o sa istelo sa iyang kinabuhi.

Hatagi og ultimatum ang imong partner. Tungod ug alang sa inyong mga anak hatagi siya og laing chance ug estoryaha siya sa seryoso nga paagi. Prangkahi siya nga kun dili gyod siya mag-usab sa iyang pagka bisyoso, mawagtang gyod ang pamilya nga nagmahal kaniya. Ingna siya nga kun dili na nimo makaya ang tanan, imo na gyod nga sultihan ang iyang mga anak sa iyang mga binuang ug inyo na siyang biyaan.

 -- Tita salie