Dugay na silang nagdumtanay si Tokles ug Ardoy. Nagsugod kini dihang si Tokles maoy gisugot ni Anita. Tungod niini nasuko si Ardoy, ang bagis dinhi sa balangay sa Magtubod. Ug dunay tabitabi nga patyon gyud ni Ardoy si Tokles kay dili siya buot nga kini maoy mabana ni Anita.
Kalma lang si Tokles nga wala manumbaling sa nadunggan niyang huhungihong nga siya dili kaabtan og usa ka semana kay may laraw na si Ardoy sa pagpatay kaniya. Kini si Tokles anak ni Marta nga nadungog nga puwerte nang mangtasa kay namugno didto sa may sityo Baybayon. Ug namatay kini kay napusilan. Apan matud pa sa wala pa kuno mamatay gibilin kang Tokles ang kabilin sa pagka-mangtas nga ungo.
“Hoy Tokles, kun mamisita ka gani nako, ayaw lang pagabii, ha kay atngan ka unya ni Ardoy diha sa dalan, awaaw ra ba nang imong agianan paingon didto sa inyong sityo...” nahingawa si Anita sa ulitawo ug maong mihatag kini’g pahimangno sa ulitawo. Apan gabii lang gihapon ang pagpamisita sa ulitawo. Maong giatngan siya ni Ardoy sa pagkanaog niya sa balay nilang Anita.
“Karon, nga nagkasugat ang atong dalan, Tokles, dawata ning hait nga pinuti kay nia koy akoa, magbuno ta. Letseng yawa, ikaw ang babag nako sa akong gugma ni Anita!” Milanog ang tingog ni Ardoy.
Nagtion sa ilang pistola ang tulo ka barkada ni Ardoy ngadtong Tokles, kay sa higayon nga dawaton ni Tokles ang pinuti ila dayon kining pusilon aron ilang palutson nga kini maoy unang mihamag kanila.
Wala dawata ni Tokles ang pinuti ug kalit lang niyang gidasmagan ang tulo ka mga barkada ni Ardoy nga wala makapabuto sa ilang armas ug gituok sila ni Tokles. Ug dihang nakuyapan na sila, miatubang si Tokles kang Ardoy.
Niya pa, “Ardoy, may higayon pa nga makalingkawas ka gikan sa tino nga kamatayon, sige na, pamiya na mo dinhi! Samtang wala pa mausab ang akong hunahuna!”
Dihang nahibalik ang panimuot sa tulo ka barkada ni Ardoy bagis naglumba sila’g panagan pahilayo gikan sa tugkaran nilang Anita. Pagka-taudtaod may nabati si Anita nga tingog sa wakwak nga naglibot-libot sa ilang balay ug gibati siya’g kahadlok ug mibukot sa habol. (Kataposan)