Isla Paraiso

Mitalikod si Rey mihana na usab paglakaw. Apan miusab pagsangpit kaniya si sister Veronica. Mihunong na usab siya ug milingi sa madre.

“God bless you always,” nagkanayon ang madre.

Igo lang miyangoyango si Rey. Ug mipadayon na siya paglakaw pahilayo sa madre.

Si sister Veronica igo lang misunod pagtan-aw kang Rey nga nagpahilayo.

Mibalik si sister Veronica sa dakbayan sa Sugbo nga gaan ang kabubut-on. Wala siya makasabot sa hingpit sa nahitabo kaniya. Mora ba’g may usa ka milagro nga nahitabo sa iyang kinabuhi.

Ingon sa dili siya makatuo sa nahitabo. Apan nakaseguro siya nga wala siya magdamgo. Si Rey gayud kadtong iyang gikasulti, nahikap, nagakos ug nahagkan. Ang lisod lang kaayong katuohan alang kaniya nga silang duha managsamang nakadawat na sa kamatuoran. May baligho gayod diay nga mahitabo sa kinabuhi sa tawo, nakaingon siya sa hilom. Karon iyang namatud-an nga dili diay tanang kapakyasan nga masinati sa tawo magdulot og kasubo ug kasakitan. May kapakyasan diay nga magdulot og kalipay. Sama sa kapakyasan nga midangat sa gugma nila ni Rey. Bisan sa maong hitabo, malipayon sila gumikan kay ang usa’g-usa kanila nakadawat sa kamatuoran nga managlahi ang ilang kalibotan. – Sumpayan pa