Giingnan ni Zeny si Ben nga nabalaka siya nga dili maka-duty kay alas kuwatro sa hapon magsugod ang trabaho niya sa call center. “Ka-grabe g’yud sa traffic uy nga mugna sa pagkabali sa dako’ng punoan sa Acacia,” matud ni Zeny. Gipasiklapan ni Ben ang iyang relo. “Kaya pa ni, makaabot pa ta Zen sa wala pay alas kuwatro. Mihuno’ng si Ben ug gibalhin niya ang iyang backpack ug diha gipahiluna sa iyang dughan. Gituyo niya aron nga dili maglisud si Zeny sa iyang pag-backride.
Tuod, mipaspas ang pagpadagan sa motor ni Ben. “Ayaw lang kahadlok Zen ha? Gunit lang nako ug ayaw paglihok,” matud ni Ben nga hilabihan kapaspas nga mipadagan. Napugos si Zeny sa paggunit sa hawak ni Ben ug midikit siya sa buko-buko sa ulitawo aron dili mabuwag.
“Hinay-hinay lang Ben kay karon pa ko makasakay og motor nga pwerte’ng kusoga ang dagan,” matud ni Zeny kang kansang mga mata mitutok sa Speedometer sa motor. Iyang nakita nga 90 KPH na ang ilang dagan og usahay mora’g moikid ang motor nga gimaneho ni Ben.
Bana-bana ni Zeny nga dili gayud sila mabuhi si Ben kun mahitabo nga maaksidente sila niini’ng gikusgon sa ilang dagan. Usahay mapaod ang iyang dughan sa buko-buko ni Ben. Sa kapaspas sa ilang dagan, alas tres pa sa hapon diha na sila sa Talisay. “Ihatod g’yud ko nimo sa akong trabahoan?” matud ni Zeny.
Miyango si Ben. “Puslan man nga nahinaykan na, ihatod na lang tika Zen,” ni Ben nga milingi kadiyot sa call center agent. Tuod, alas 3:30 sa hapon, didto na sila sa IT Park nga nahimutangan sa gitrabahoan nga call center ni Zeny.
“Ako ka usa nga imbitahon og snack Ben, ako’y bangka kay dako kaayo ko’g utang kabubut-on nimo,” matud ni Zeny nga nagpahiyom. Wala mobalibad si Ben. Samtang nagpaabot sa ilang order, gisudlay ni Zeny ang iyang kalkag nga buhok. Naaninaw ni Ben ang kaanyag ni Zeny. (Sumpayan)