Gugma nga makabuang

Wala tuyoa nga nakapahiyom si Lino pagkakita niya kang Hazel nga miabot sa tindahan nga iyang giimnan. Motindog unta siya aron duolon ang kanhi niya girlfriend apan nagpanuko siya kay iyang nahuna-huna nga basin og dili siya tagdon.

Mitan-aw si Hazel kang Lino ug taud-taud miduol kini kaniya. Milingkod si Hazel sa lingkoranan atubangan ni Lino ug nangumusta kaniya. “Dia, puno sa kagul-anan kay nahisama ako karon sa tawo nga sanglahon, giyam-iran na sa katawhan,” pasumbingay ni Lino.

“Unsay buot mo ipasabot? Tingali malipayon na kamo si Nympha kay matingob na man kaniya ang imong pagtagad karon nga wala na ako sa imong kinabuhi,” matud ni Hazel. Miginhawa’g lawom si Lino ug gibuhian ang halawom nga panghupaw.

“Gibuwagan ko ni Nympha dili pa g’yud dugay. Daan na niya ako nga gipasidan-an nga kun iyang masayran nga may lain akong babaye sa kinabuhi iya g’yud ko nga biyaan. Karon nahitabo na g’yud,” kahilakon si Lino nga misaysay kang Hazel.

Naluoy si Hazel kang Lino apan gipasabot niya ang iyang kanhi boyfriend. “Susama ang among gibati ni Nympha. Dili tukma ang imong gihimo Lin nga lumpongon mo ang duha ka babaye,” ni Hazel.

May misulod nga lalaki sa tindahan. Mitindog si Hazel ug gisugat ang lalaki. Natingala kaayo si Lino. Mibalik si Hazel sa lamesa ni Lino kauban ang lalaki. “Jeff, siya mao si Lino ang giingon ko nimo nga kanhi nako boyfriend. Lin, mao ni si Jeffrey nga kanhi nako boyfriend sa wala pa kita. Nagsabot na kami nga magminyo,” matud ni Hazel.

Imbes nalipay na unta si Lino nga nagkita sila pag-usab si Hazel, apan nadugangan na hinuon ang iyang kasakit. “Sige Lin, biyaan ka namo kay manimba pa kami ni Jeffrey sa Cathedral,” matud ni Hazel nga nagbilin og matam-is nga pahiyom kaniya. Halos mabuang si Lino sa grabe’ng kaguol. (Kataposan)