Isla Paraiso
Gula 250
“Nganong isakripisyo mo man ang imong pagbati?” Nagpamahid si sister Veronica sa iyang mga luha. “Karon na hinuon nga andam na ako sa pagpakig-unong kanimo, Rey?”
“Anad na ako sa pagsakripisyo, sister Veronica,” matud ni Rey. “Sukad pa kaniadto nga gisakit ako sa kapalaran.”
“May kalipay nga nagpaabot ang tanan nga gisakit, Rey.”
“Nasayod ko. Apan kun ang maong kalipay dili man dumalayon mas palabihon ko pa nga mag-antos. Total, naanad na ako niining kinabuhia. Anad na ako sa kapakyasan ug pag-antos.”
Kahilom. “Padayon sa imong bokasyon, sister Veronica,” ni Rey pa. “Husto ka sa imong giingon nga mao gayud kini ang imong kalibotan. Dawaton ta na lang ang kamatuoran nga kita dili gayud angay sa usa’g-usa.” Nagpabilin sa kahilom si sister Veronica.
“Daghang salamat sa higayon nga gilipay mo ako,” namulong na usab si Rey. “Dili ko gayud hikalimtan kadtong higayon nga gipatagamtam mo kanako ang kalipay dihang gidawat mo ang akong gugma. Nalipay ako nga bisan sa hamubong panahon, gihatagan mo ako’g higayon nga magmalipayon uban kanimo. Daghang salamat sa imong kaayo ug kabuotan. Karon, mag-iyahay na kita’g subay sa managlahi tang dalan sa kinabuhi. God bless you and good luck, sister Veronica. Hinaut unta nga makabaton ka nag peace of mind.” (Sumpayan pa)
- Latest
