Isla Paraiso
Gula 249
“M-matud mo, gihigugma mo ako?” ni sister Veronica.
“Labaw pa sa paghigugma ko sa akong kaugalingon,” daling salo ni Rey. “Apan ikaw ra usab ang nag-ingon nga ikaw gayod alang sa Ginoo ug dili alang kanako.”
“Tapos sa daghang mga pagsulay nga akong nasugatan,” ni sister Veronica pa, “inanay nga nabuka ang akong mga mata sa kamatuoran nga ikaw alang gayod diay kanako ug ako alang kanimo.”
“Tingali’g magmahay ka sa imong hukom,” nagkanayon si Rey. “Samtang wala ka pa mahinayak ayaw na lang kini buhata.”
“R-Rey, nasayod ko nga sa kanunay gisabot mo ako. Busa hangyoon ko ikaw nga sa laing higayon sabton mo ako. Please, hatagi ako’g laing higayon.”
“Nasayod ko nga naluoy ka lang kanako,” ni Rey pa. “Wala ako magpaabot nga imong kaluy-an.” Dili man tingali ako ang labing alaot ug makaluluoy sa tanan. Alang kanako, igo na kanako nga gihigugma ko ikaw. Wala na ako magpaabot og tugbang sa maong gugma. Malipay na lang akong magpalandong nga may babaye ako nga gihigugma bisan siya wala magmahal kanako. Timan-i lang nga higugmaon ko ikaw hangtod sa kahangtoran. Bawion man sa kahitas-an ang akong kinabuhi, apan ibilin ko kanimo ang akong kasingkasing.” (Sumpayan pa)
- Latest
