Ang maong bahin sa isla diin mahilumon nga naglingkod si Rey nahilayo sa gipangtukod nga mga cottage. Mingaw ang maong dapit.
Gisud-ong ni Rey ang katahom sa pagsubang sa adlaw sa kabuntagon. Matahom kaayong tan-awon ang pagsubang sa adlaw sa Isla Paraiso. Wala siya makasud-ong sa katahom sa pagsalop sa adlaw sa Manila Bay kon Manila Bay Sunset. Apan nagtuo siya nga mas matahom ang pagsubang sa adlaw sa Isla Paraiso kay sa pagsalop niini didto sa Manila Bay.
Ang pagpahimulos ni Rey pagsud-ong sa katahom sa pagsubang sa adlaw ginuntan usab sa paraygong hikap sa huyohoy nga misapigad sa iyang mga bukton. Gibati ni Rey ang tumang kahilwas sa kaugalingon. Iyang gibati nga daw nahibalik siya niadtong karaang panahon nila ni Adan ug Eba didto sa tanaman sa Eden diin napanag-iya nila ang kaharuhay sa kinabuhi nga wala’y kabalaka. Samtang nagsud-ong si Rey sa katahom sa kinaiyahan, ingon sa wala niya mahinumdomi nga may kalisdanan siyang gisuong sa nangaging mga yugto sa iyang kinabuhi.
Unya, mao na usay gitutokan ni Rey ang gagmay’ng bawod nga paraygon kaayong mihalok sa aping sa lapyahan. Nalingaw siyang nagtan-aw niini.
Unya, takulahaw lang, naigking si Rey. Namatikdan niya nga may mitimpasaw didto sa tubig dili layo sa bato nga iyang gilingkoran. -- (Sumpayan pa)