Isla Paraiso - Gula 244

Kun wala si sister Veronica mahiadto sa balay ni Benturada ug nakasulti ang naulahi, dili siya mahinumdom sa Isla Paraiso nga usa sa labing kinaham nga dapit ni Rey.

Wala pa mohagtok ang ikapito sa kabuntagon sa paghiabot nila sa Isla Paraiso. Pagdunggo gayod sa pump  boat nga ilang gisakyan, si sister Veronica nanaog dihadiha aron pagpangita kang Rey.

Nagmingaw pa ang tibuok isla. Wala pay tawo nga nagtikawtikaw. Nahinanok pa tingali ang mga turista nga nagpalabay sa kagabhion sa labing ulahing naugmad nga isla nga nahisakop sa lalawigan sa Sugbo. Dugay kaayong nahatagan og pagtagad ang maong isla sa mga namunoan sa lalawigan gumikan kay kini nahimutang habig sa Bohol ug nagtuo ang mga opisyal sa kagamhanan nga malisod na kining aboton sa mga turista. Apan sa dihang nag-anam nag kadaghan ang mga turista nga mibisita sa lalawigan, nahukman sa mga anaa sa kagamhanan nga ugmaron ang isla Paraiso aron kini mahimong laing tourist spot sa lalawigan.

Tulin nga naglakaw si sister Veronica sa ibabaw sa timgas nga balas sa baybayon. Ang iyang mga mata wala mohunong sa pagpangsuhid sa mga talan-awon sa palibot aron pagpangita kang Rey.

Niadtong tungora, didto sa habig sa sidlakan sa isla Paraiso si Rey, mahilumon nga naglingkod sa usa ka bato. -- Sumpayan pa