Mideritso pagsulod si Dave sa pansayan sulod sa ilang lawak ni Cherry. Wala niya kalikayi ang pagpangambak sa mga lusok sa luha sa iyang mga mata. Karon, anam-anam na gayud nga migitib sa kaisipan ni Dave nga gibudhian siya ni Cherry.
“Dave.. naa ka sa CR? Molakaw usa ko’g kadiyot,” nadungog ni Dave ang tingog ni Cherry didto sa sulod sa ilang kuwarto. Wala siya motubag kay naghuot pag-ayo ang iyang dughan. Taud-taud, nadungog ni Dave ang andar sa awto ni Cherry.
Migawas si Dave ug gitan-aw sa gawas sa balay. Wala na g’yud ang kotse sa iyang asawa. Nakapanghupaw siya ug misamot sa pagpanglugmaw ang iyang mga luha nga naghuna-huna sa iyang nakita nga mga kagamitan sa usa ka lalaki sulod sa drawer sa awto ni Cherry.
Naglaom si Dave nga pinaagi sa gamay’ng voice recorder nga hilom niya’ng gibutang sa kotse ni Cherry, mahibaw-an niya kun unsay binuhatan sa iyang asawa panahon nga mabuntagan kini pagpauli.
Batan-on pa si Dave ug hitsuraan ‘sab, mao nga daghang mga babaye ang makagusto gani kaniya bisan og masayod nga minyo na siya.
Ang mga tintal sa iyang pagka lalaki gipanglimbasogan gayud ni Dave nga maalkontrahan kay mao ra kini ang ikapasigarbo niya. Adunahan sila si Cherry ug kasarangan lang ang kahimtang sa mga ginikanan ni Dave. Tungod hinuon sa paningkamot ni Dave, nakaangkon siya og arang-arang nga trabaho sa ilang kompaniya apan wala gihapon kini hatagi og gibug-aton sa mga ginikanan ni Cherry. Sa unang higayon mapinanggaon kaayo si Cherry kang Dave, apan diha nga nakuha ang iyang gimabdos, nausab ang iyang tinagdan kang Dave.
Walay panihapon si Dave nga mihigda ug naghanduraw sa masulob-on niya nga kaminyoon. Hangtod nga giganoy siya sa katulogon. Nakamata si Dave mga tunga’ng gabii, apan wala pa gihapon mauli si Cherry. Napul-an na si Dave nga mokontak kang Cherry nga dili gayud motubag sa iyang mga tawag basta molakaw siya panahon sa gabii. Sama sa naandan, lapas na sa alas dos sa kaadlawon nga nauli si Cherry. (Sumpayan)