Dear Tita Salie,
Hi! Good day. Tagoa lang ko sa pangalan nga Arman, 17 yrs of age. Bulag na ang akong mga ginikanan ug ania ako sa poder sa akong inahan.
Ang akong problema mahitungod kini sa akong inahan. Magsige na man god og suyop ang akong mama. Unya bisan kinsa lang mga lalaki ang iyang kauban. Mora’g nabuang na ang akong inahan sa iyang bisyo, Tita Salie, ug mao na kini ang hinungdan nga wala na ko makapadayon sa akong pag-eskuyla.
Ang akong manghod napugos na lang pagminyo bisan 15 yrs old pa siya aron mabuhi uban sa iyang bana.
Unsa may maayo nakong buhaton? Palihog pasabta intawon ko, Tita Salie. Salamat kaayo.
* * *
Maayong adlaw Arman,
Tungod seguro sa kaguol nga nagkabulag ang imong inahan ug amahan ang hinungdan kun nganong naingon niana ang imong inahan karon. Tingali kun mao kini ang nahunahunaan sa imong inahan nga buhaton aron malingaw siya sa iyang kinabuhi.
Pangita og maayong higayon nga dili sabog ug hubog ang imong inahan. Kanang panahon nga bag-o siyang mata, or kun duna siya’y gipamati sa lawas, atimana siya og maayo. Ipakita sa imong inahan nga bisan kun wala na ang imong amahan anaa ka nga nagmahal sa imong inahan. Imong ipakita kaniya nga anaa ka pa nga nagmahal ug nagkinahanglan kaniya.
Mao ra gyod kini ang imong buhaton nga ipa-feel kaniya sa gugma sa imong amahan nga nahanaw na. Kay mao kini ang hinungdan kun nganong nagpakawala ang imong inahan. -- Tita Salie