Si James ug si Jenny

Wa gyud malipay si Panta nga nagbuhi sila’g iro, kay tingali unya kuno’g makapaak problema na kun unsa unyay ibayad sa injection. Sa dihang nakalakaw na si James ug si Jenny sa tungha-an, kanunay silang maglalis si Panta ug ang iyang asawang si Esang.

“Ihawon ko kanang atong iro Esang mintras dili pa kana makapaak. Maayo pa kanang kalderetason kanang iro aron wala tay problema, mahal kaayo ang bayad sa injection sa rabis.”

“Unsa guy makapaak nga buotan man kaayo nang atong iro. Gawas pa gibakunahan man kana. Gidili baya ron ang pag-ihaw og iro. Naa tay balaod nga Animal Welfare Law” pasabot ni Esang.

“Ah ihawon gyud na nako kanang iro basta makalugar ko”.

“Dili lagi na mahimo kay pinangga kaayo na ni Jenny kanang iroa, unsa man unya ang bation ni Jenny kun imong ihawon si James.”

O tinuod pinangga kaayo ni Jenny si James nga ilang iro. Siya maoy mangako sa pag-atiman niini, pagkaligo, pagkaon. Niadtong itoy pa si James kanunay niyang idulog sa paghigda. Kanang magluya si James ila dayong ikonsulta ni Daniel ang ilang beterenaryo sa lungsod aron maatiman kini.

Sama sila sa suod nga mga higala, gikan sa Lunes hangtud Biyernes buntag, udto ug hapon ihatod ug kuhaon ni James si Jenny sa ilang tunghaan. Kini maoy silbing tig- panalipod ni Jenny diha sa dalan nga ilang paga-agian. Dihay higayon nga dunay iro buot moataki nila, gibugno kini ni James hangtod nga midagan kini nga gibahag ang ikog niini.

Apan usa ka hapon niana sa dihang migula siya sa gate sa tunghaan wala niya makita si James. Giliraw niya ang iyang mga mata apan wala’y James nga nakita. Midali siya’g lakaw pauli aron masusi ang kahimtang ni James. Apan dili layo sa gate sa tunghaan may iro siyang nakita naglubog ug nag- kadugo. Iya kining giduol ug gisusi miyahat ang mga mata niini ug mikitiw ang ikog niini. Gustong mubarog apan dili na makabarog.

“James, James.” Mihilak si Jenny, kinsang tawhana ang nag-among among nimo. Wala siya’y balatian, tampalasan siya. Iya kining gikugos ug dayong bugto sa kinabuhi ni James. (Katapusan)