Kargador

Samtang naghulat sa barkong modunggo si Romy uban sa mga kaubang kargador o porter sa piyer niadtong kaadlawona, maoy nasugat sa iyang panan-aw ang pag-abot sa usa ka bag-ong itom nga Toyota Fortuner nga migrahe sa daplin uban sa naglinyang mga taksi.

Nakugang si Romy, kay gikamay siya sa nagdrayib sa maong luhong sakyanan human kini makakanaog. Diha pa maklaro ni Romy sa iyang pagduol ang tag-iya sa Toyota Fortuner.

“Ikaw man diay ni, Bay Nick! Halos di man ko makaila nimo!” ni Romy nga mitutok kang Nick. “Oo, ako kini, Bay Rom! Duna koy sugaton nga pasahero sa barko nga modunggo ning kaadlawona...!”

“Yatis, asenso kana man gyud og ayo, Bay Nick! Sulod sa lima na ka tuig mong pagbiya isip porter o kargador dinhi sa piyer, hilabihan man ka paspas sa imong pag-asenso...!” ni Romy nga milamano kang Nick, nga mapagarbuhon kaayong naglingilingi. Ang ubang kaubanang porter ni Romy nga kanhi kauban usab ni Nick, mialirong usab kaniya. “Mao nga tambagan ko kamo, ilabi na ikaw, Bay Rom! Biya na mo ning trabahoa dinhi sa piyer, kay wa gyud moy mapaabot nga asenso ug di mo makatagamtam og kaharuhay sa pagpuyo uban sa pamilya....!” ug guduol ni Nick si Romy ug gihunghongan.

“Ikaw, Bay Rom, kun gusto ka’g asenso sa kinabuhi, tanyagan tika’g maayong trabaho! Ugma sa hapon, duawa ko’s among balay sa siyudad sa Mandaue aron makasugod dayon ka’g hayahay nga trabaho!” ni Nick nga mitunol sa iyang tarheta kang Romy.

Napulo na ka tuig nga nahisakop si Romy sa mga kargador o porter sa piyer-2. Ang mga porter mao ang gitahasan sa kompaniya sa usa ka barko nga mao lang ang makasugat sa barkong modunggo ug sa mga sakay nga pasahero, aron maoy mualsa sa mga kargamento niining bug-at, bugti sa presyo nga pangayuon sa mga porter pinaagi sa pagsabot-sabot. Sila usab ang muabag sa mga pasahero nga mosakay sa barko matag gabii nga adunay bug-at nga bagahe ug ihatod ngadto sa itaas sa barko, nga ipaagi gihapon sa sabot-sabot ang ibayad ngadto sa mga porter.

Hinuon, kuntento na si Romy sa iyang kinitaan matag adlaw sa piyer nga igong ibuhi sa iyang asawang si Gelie uban sa panganay nilang anak lalake nga magsingko anyos na.

Pagkaugma sa hapon, naatol nga daghang pasahero sa barko nga giatiman ni Romy ug maoy hinungdan nga wa siya makaadto sa balay ni Nick sa siyudad sa Mandaue. Unya, nagubot ang kaubang porter ni Romy diha sa usa ka karenderya sa piyer-2, dihang may gi-flash nga breaking news sa TV. “Level one drug pusher sa siyudad sa Mandaue nadakpan. Siya mao ang idlas nga si Nick Barakbarak uban sa iyang mga sakop nga drug pushers!”

Ug nakita nila ni Romy sa TV screen si Nick nga giposasan uban sa 15 niya ka sakop nga tig-repak og shabu. Hilom nga nakapanglingo si Romy. Nakahangad siya sa Kahitas-an. Ug nahinayon pa siya sa pag-adto sa balay ni Nick niadtong hapona, segurado siyang maapil sa pagdakop sa mirondang taga PDEA. Ug nakatuaw sa hilom si Romy. “Bahala na’g kabos nga kargador sa piyer, basta sa tinarong lang nga paagi sa pagpanguwarta...!” (Kataposan)