Isla paraiso

Hangtod karon wala pa si sister Veronica makabalita mahitungod kang Rey. Nahisama kini sa usa ka sam-iran nga nahulog taliwala sa lawod sukad sa pagkagiw niini sa tambalanan.

Nangandoy si sister Veronica nga magkakita sila pag-usab ni Rey. Dili pa ulahi ang tanan. Kun magkita sila, hulipan niya ang iyang mga pagkulang ngadto niini. Karon pa siya makaamgo nga mahinungdanon diay kaayo si Rey alang kaniya. Karon pa niya matugkad nga tinuod diay ang sanglitanan nga anha mo na makita ang kabililhon sa usa ka butang kun kini mawala na kanimo.

Oo, bililhon si Rey alang kaniya. Gimahal niya kini.

Apan asa man kaha niya pangitaa si Rey karon?

Kini ang pangutana nga nakapahisagmuyo kaniya. Wala siya’y ideya kun hain karon si Rey. Bisan gani ang kapolisan wala’y kasayoran kun hain kini karon. Malagmit nga nagpahilayo na gayod si Rey sa dakbayan sa Sugbo. Kun matinuod kining iyang katahap, malagmit nga dili na gayod siya makatugot nga mahitabo kini. Gusto pa siyang mangayo og pasaylo kang Rey. Gusto pa niyang ipabati ngadto sa lalaki nga gimahal niya kini. Gusto siyang masumpayan ang naputol nilang sugilanon. Kun magkakita sila pag-usab, dili na gayod siya motugot nga magkalagyo pa sila. Oo, dili na gayod. Gusto siya nga magkauban na sila hangtod sa kataposang pitik sa ilang mga kasingkasing.

Lawom nang gabii apan ingon sa nagmaidlas gayod ang katulogon kang sister Veronica. Nakahilak na hinuon siya samtang padayon nga naghunahuna kang Rey. -- Sumpayan pa